ވެކްސިން ނުޖަހާ ޓީޗަރުން ވަޒީފާއިން ވަކި ކުރާކަށް ނުނިންމަން: މިނިސްޓްރީ
ކޮވިޑް-19އިން ދިފާޢުވުމަށް ޖަހަމުން އަންނަ ވެކްސިން ނުޖަހާ ޓީޗަރުން ވަޒީފާއިން ވަކި ކުރަން އެ މިނިސްޓްރީން ނިންމައިފައި ނުވާ ކަމަށް އެ މިސްޓްރީން ވިދާޅުވެއްޖެއެވެ.
އޮންލައިން ނޫސް "މިހާރު"އިން ޕްރިންސިޕަލަކާ ހަވާލާދީ ރިޕޯޓްކޮށްފައިވާ ގޮތުގައި، ކޮވިޑް-19އިން ދިފާޢުވުމަށް ޖަހަމުން އަންނަ ވެކްސިން ނުޖަހާ ޓީޗަރުން ވަޒީފާއިން ވަކި ކުރަން އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ މިއަދު ވިދާޅުވެފައިވާ ކަމަށެވެ.
އެ ގޮތަށް ވިދާޅުވި ޚަބަރު ޓްވީޓް ކުރައްވަމުން އަޙްމަދު އަލީ ވިދާޅުވީ، އެ ޚަބަރުގައި ހިމަނައިފައި ވަނީ ތެދު މައުލޫމާތެއް ނޫން ކަމަށާއި އެގޮތަށް ބުނެފައި ނުވާނެ ކަމަށެވެ. އަދި އެފަދަ ނިންމުމެއް ނިންމައިފައި ނުވާނެ ކަމަށް ވެސް އޭނާ ވިދާޅުވިއެވެ.
"މި ޚަބަރުގައި ވަނީ ތެދު މައުލޫމާތެއް ނޫން. ވެކްސިން ނުޖަހާ މުވައްޒިފުން ވަޒީފާއިން ވަކިކުރާނެ ކަމަށް އަޅުގަނޑު ބުނެފައެއް ނުވާނެ. އަދި އެފަދަ ނިންމުމެއް ނިންމައިފައެއް ނުވާނެ" އަޙްމަދު އަލީގެ ޓްވީޓްގައި ވިދާޅުވިއެވެ.
އެޑިއުކޭޝަން މިނިސްޓްރީއާ އެކު މިއަދު ސްކޫލުތަކުގެ ޕްރިންސިޕަލުންނާ އެކު ބޭއްވި ބައްދަލުވުގައި ބައިވެރިވި ޕްރިންސިޕަލަކާ ހަވާލާދީ "މިހާރު" ނޫހުން ބުނެފައި ވަނީ ވެކްސިން ނުޖަހާ ޓީޗަރުން ސްކޫލަށް ނުވެއްދުމަށް އަންގައިފައިވާ ކަމަށެވެ. އަދި މާދަމާ ވެކްސިން ނުޖަހާ ޓީޗަަރަކު ސުކޫލަށް ހާޒިރުވެއްޖެ ނަމަ ގެޔަށް ފޮނުވާލަން ޖެހޭނެ ކަމަށް ބުނެފައިވާ ކަމަށް މައުލޫމާތުން ދިން ފަރާތުން ހާމަކުރެއެވެ.
މީގެ އިތުރުން ސަރުކާރުގެ މުވައްޒަފުން ވެކްސިން ޖެހުމަށް އެޗްޕީއޭއިން އިލްތިމާސްކޮށްފައިވާއިރު، އެގޮތަށް އަމަލު ނުކުރުމަކީ ސިވިލް ސާވިސްގެ ކޯޑް އޮފް ކޮންޑަކްޓާ ހިލާފުވި ކަމެއް ކަމަށް ބެލޭނެ ކަމަށާއި މިހެންކަމުން ވަޒީފާއިން ވަކިކުރާނެ ކަމަށް އަޙްމަދު އަލީ ވިދާޅުވި ކަމަށް ޕްރިންސިޕަލާ ހަވާދީ ބުނެފައި ވެއެވެ.
އެޑިއުކޭޝަން މިނިސްޓްރީންވަނީ ސްކޫލުތައް ހުޅުވޭއިރު، ސްކޫލަށް ވަދެވޭނީ ވެކްސިން ފުރިހަމަކޮށްފައިވާ ފަރާތްތަކަށް ކަމަށް މީގެ ކުރިން އަންގައިފައެވެ.
Ads by STO
