ސަރުކާރަށް އެމްޑީޕީ ނޫން ފަރާތްތައް ނުފޫޒު ގަދަކޮށް ނަޝީދުގެ މައްސަލަ ލަސް ކުރާކަމަށް ތުހުމަތުކޮށްފި
ސަރުކާރުގައި ބޮޑު ޕަސެންޓެއް ނަންގަވައިގެން ތިއްބެވީ އެމްޑީޕީއާ އިދިކޮޅު ފަރާތްތައް ކަމަށާއި ރައީސް ނަޝީދުގެ ރައްކާތެރިކަން ލިބުން ކަށަވަރު ކުރުމާއި އެއަށް ރައްދު ދެއްވުމާއި އޭގެ ފިޔަވަޅުތައް އެޅުމާއި މިކަމާ ބެހޭ މައުލޫމާތު ހިއްސާ ކުރެއްވުމަށް ލަސްކަމެއް އަންނަނީ އެފަރާތްތަކުގެ ނުފޫޒުން ކަމަށް އެމްޑީޕީގެ ސްޕޯކްސް ޕާރސަން އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވެއްޖެއެވެ.
ރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުން އިންތި ވިދާޅުވީ ރައީސް މުހައްމަދު ނަޝީދާ ވަރަށް ދެކޮޅު އަދި ރައީސް ނަޝީދުގެ ވެރިކަން ވެސް ވައްޓައިލާން މަސައްކަތް ކުރެއްވި އޭރުގެ ފަރާތްތައް ވެސް މިއަދުގެ ސަރުކާރުގައި ބޮޑު ޕަސެންޓް ނަންގަވައިގެން އެބަ ތިއްބެވި ކަމަށެވެ
"އަޅުގަނޑަށް ފަހަރުގައި މީ ތުހުމަތެއް ކަންނޭނގެ އަޅުގަނޑަށް އެބަ އެނގޭ ސަރުކާރުގެ ބޮޑު ޕަސެންޓް މިއޮތީ އެމްޑީޕީ ނޫން ފަރާތްތަކުގެ އަތްމަތީގައި އަނެއްކާ އެމްޑީޕީގެ ރައީސްއަކަށް ސަލާމަތާ ރައްކާތެރިކަން ދިނުމަށް ސަރުކާރުން އެމްޑީޕީއާ އިދިކޮޅު ފަރާތްތައް ސަރުކާރުގައި އެހާ ގިނަ ހާއްސަކޮށް ރައީސް މުހައްމަދު ނަޝީދާ ވަރަށް ދެކޮޅު އަދި ރައީސް ނަޝީދުގެ ވެރިކަން ވެސް ކުރީގަ ވަައްޓާލަން މަސައްކަތް ކުރެއްވި އަދި ރައީސް މުހައްމަދު ނަޝީދުގެ އިސްތަށިފުޅުގައި ލާދީނީ ޓެގު އެޅުވުމަށް އެންމެ ބޮޑަށް މަސައްކަތް ކުރެއްވި އޭރުގެ ފަރާތްތައް ވެސް މިއަދުގެ ސަރުކާރުގައި ބޮޑު ޕަސެންޓް ނަންގަވައިގެން އެބަ ތިއްބެވި" އިންތި ވިދާޅުވިއެވެ.
އިންތި ވިދާޅުވީ ރާއްޖެ ވަޑައިގަތުމަށް ޖެހިލުންވާ ކަމަށް ވިދާޅުވެ ރައީސް ނަޝީދު މަޖިލީހަށް ފޮނުވި ސިޓީފުޅާއެކު ވެސް ސަރުކާރުން ކޮންމެސް އެއްޗެއް ވިދާޅުވާން ޖެހޭނެކަމަށް ދެކިވަޑައިގަންނަވާކަމަށެވެ.
"އަޅުގަނޑު އެންމެ ކަންބޮޑު ވަނީ މި ސިޓީފުޅު ވެސް އެޔާ ވިދިގެން ސަރުކާރުން ކޮންމެސް އެއްޗެއް ވިދާޅުވާން ޖެހޭނެކަމަށް އަޅުގަނޑު ދެކެނީ އެހެން ނަމަވެސް މިއަދާ ހަމައަށް އަޅުގަނޑަކަށް އަދި ފާހަގައެއް ނުކުރެއްވޭ ސަރުކާރުގެ ފަރާތްޕުޅުން މިކަމަށް ރިއެކްޓް ކުރައްވާ ރައީސް މުހައްމަދު ނަޝީދުގެ ސަލާމަތާ ރައްކާތެރިކަން އެމަނިކުފާނު އެނބުރިވަޑައިގެން ރައްޔިތުންގެ މަޖިލީހުގެ މަސައްކަތްފުޅު ކުރައްވަން ރިޔާސަތު ބަލަހައްޓަވަން ފެއްޓެވުމަށް އެފުރުސަތު ރައްކާތެރިކަމުގެ ފުރުސަތު އެ ޔަގީންކަން ދެއްވި ތަނެއް އަދި ނުފެނޭ އެހެންވީމާ އަޅުގަނޑު ކަންބޮޑުވުން ފާޅުކުރަން" އިންތި ވިދާޅުވިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްގެން ދިން ނުރައްކާތެރި ޓެރަރިސްޓް ހަމަލާގެ ތަހްގީގު އަދި ނުނިމި ކުރިއަށް ދާއިރު، ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެނބުރި ރާއްޖެއަށް އައުމަށް ޖެހިލުންވާކަމަށް ވިދާޅުވެ އެމަނިކުފާނު ވަނީ ރަައްޔިތުންގެ މަޖިލީހުގެ ނައިބު ރައީސާ އީވާ އަބްދުﷲ އަށް ސިޓީފުޅެއް ފޮނުއްވައިފައެވެ.
