ހައެއް ފަހެއްގެ ހަމަލާ: ދައުވާކުރި ހަތަރު މީހުންގެ ބަންދުގެ މުއްދަތު ދަމަހައްޓައިފި
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގެ މައްސަލައިގައި މިހާތަނަށް ދައުވާކޮށްފައިވާ ހަތަރު މީހުންގެ ބަންދު ކްރިމިނަލް ކޯޓުން މިއަދު ދަމަހައްޓައިފިއެވެ.
ރައީސް ނަޝީދު ދިރިއުޅުއްވާ ގެކޮޅު ކައިރިން ސައިކަލެއްގައި އައިއީޑީއެއް ހަރުކޮށް ގޮއްވައިލި ހާދިސާގައި އެމަނިކުފާނަށް ވަނީ އެކިވަރުގެ އަނިޔާ ލިބިފައެވެ.
މި ހަމަލާއާ ގުޅިގެން 10 މީހަކު ހައްޔަރުކޮށްފައިވާއިރު، ދައުވާ ކޮށްފައި ވަނީ އޭގެ ތެރެއިން ހަތަރު މީހަކަށެވެ. އެއީ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ނ. މަނަދޫ، ނޫރީގެ އަލީ ހައިޝަމްގެ މައްޗަށެވެ.
މި ހަތަރު މީހުންގެ ތެރެއިން އަދުހަމް، މުޖާޒް އަދި ތަހުމީން މިދިޔަ މަހުގެ 21ވަނަ ދުވަހު ވަނީ ޝަރީއަތް ނިމެންދެން ބަންދުކޮށްފައެވެ. މިއަދު އޮތީ އެ މީހުންގެ ބަންދު މުރާޖައާ ކުރުމުގެ ބައިކަމަށް ވާއިރު، އެ މުރާޖައާއަށް ފަހު ވަނީ ބަންދު ދަމަހައްޓައިފައެވެ.
ހައިޝަމް މިއަދު ކްރިމިނަލް ކޯޓަށް ގެންދިޔައީ މިދިޔަ މަހުގެ 21 ވަނަ ދުވަހު އޭނާގެ ބަންދަށް ޖެހި 30 ދުވަހުގެ މުއްދަތު ހަމަވާތީ ބަންދާ މެދު އިތުރަށް ގޮތެއް ނިންމުމަށެވެ. އަދި ކޯޓުން ނިންމައިފައި ވަނީ އޭނާ ޝަރީއަތް ނިމެންދެން ބަންދު ކުރާށެވެ.
