މޮނިޓަރިންއަށް ލައިފައިވާ ރަށްރަށުގެ އަދަދު 26 އަށް އަރައިފި
ކޮވިޑް19ގެ ވޭދަނަތައް އަތޮޅުތަކުގެ ތެރެއިން ފެންނަ މިންވަރު އިތުރުވެ، މޮނިޓަރިންއަށް ލައިފައިވާ ރަށްރަށުގެ ޖުމްލަ އަދަދު 26އަށް އަރައިފިއެވެ.
ހެލްތު ޕްރޮޓެކްޝަން އެޖެންސީގެ އެންމެ ފަހުގެ ތަފާސް ހިސާބުތަކަށް ބަލާލާއިރު މިވަގުތު އެންމެ ގިނަ ދުވަސް ވަންދެން މޮނިޓަރިންގައި އޮތް ރަށަކީ މިދިޔަ މެއި މަހުގެ 25 ވަނަ ދުވަހު މޮނިޓަރިންއަށް ލައިފައިވާ ރ. ދުވާފަރެވެ. އަދި ދެވަނައަށް އެންމެ ގިނަ ދުވަހު މޮނިޓަރިންގައި އޮތް ރަށަކަށް ޖުލައިމަހުގެ 13 ވަނަ ދުވަހު މޮނިޓަރިންއަށް ލައިފައިވާ ކ. ކާށިދޫ އޮތްއިރު އެންމެ ފަހުން މޮނިޓަރިންއަށް ލައިފައި ވަނީ އިއްޔެގެ ވަގުތެއްގައި މޮނިޓަރިންއަށް ލައިފައިވާ ރ މަޑުއްވަރީއެވެ.
އެޗްޕީއޭގެ ތަފާސް ހިސާބުތަކުން ދައްކާގޮތުގައި މިވަގުތު މޮނިޓަަރިންގައި އޮތް ރަށްތަކުގެ ތެރެއިން އެއް ދުވަހެއްގެ ތެރޭ އެންމެ ގިނަ ރަށް މޮނިޓަރިންނަށް ލައިފައިވާ ދުވަހަކީ މިދިޔަ އޯގަސްޓުމަހުގެ 28 ވަނަ ދުވަހެވެ. އެދުވަހު ވަނީ ޖުމްލަ 9 ރަށް މޮނިޓަރިންއަށް ލައިފައެވެ. މިގޮތުން އެދުވަހު މޮނިޓަރިންއަށް ލައިފައިވާ ރަށްރަށަކީ އދ.މަހިބަދޫ، ވ.ތިނަދޫ، ށ.ކަނޑިތީމް، ހދ. ނޮޅިވަރަމް، މ.ވޭވަށް، އަދި އައްޑޫ ސިޓީގެ ގުޅިފައިވާ ރަށްތައް ކަމުގައިވާ ސ. ހިތަދޫ، ސ. މަރަދޫ، ސ.މަރަދޫފޭދޫ އަދި ސ.ފޭދޫއެވެ.
މޮނިޓަރިންއަށް ލައިފައިވާ އިތުރު ރަށްރަށަށް ބަލާލާއިރު މިދިޔަ ޖުލައި މަހުގެ 29 ވަނަ ދުވަހު މޮނިޓަރިންއަށް ލައިފައިވާ ށ. ފީވައް ވެސް އަދިވެސް މޮނިޓަރިންއިން ނަގައިފައެއް ނުވެއެވެ. ޖުލައި މަހު މޮނިޓަރިންނަށް ލައިފައިވާ އަނެއް ރަށަކީ ދ. ކުޑަހުވަދޫއެވެ.
އޯގަސްޓު މަހުގެ 3 ވަނަ ދުވަހު އއ. ހިމަންދޫ މޮނިޓަރިންއަށް ލައިފައިވާއިރު އެމަހުގެ 16 ވަނަ ދުވަހު މޮނިޓަރިންއަށް ލީ އދ. ހަންޏާމީދޫއާއި ހއ. އިހަވަންދޫ ވެސް އަދިވެސް ވަނީ މޮނިޓަރިންގެ ހާލަތުގައެވެ.
ކޮވިޑް-19 ވޭދަނަތައް ފެނި މޮނިޓަރިންއަށް ލާފައިވާ އިތުރު ރަށްރަށަށް ބަލާލާއިރު މ. މަޑުއްވަރީ، ކ. ގާފަރު، ފުވައްމުލަކު ސިޓީ، ގދ. ގައްދޫ، ގދ، މަޑަވެލި، ތ.ވޭމަންޑޫ، ލ.މުންޑޫގެ އިތުރުން ށ.މިލަންދޫއާއި ހދ. ނޮޅިވަރަމްފަރު ހިމެނެއެވެ.
