އިތުރު ފަސް ރަށެށް މޮނިޓަރިންގެ ހާލަތުން ނަގައިފި
ކޮވިޑް-19ގެ ވޭދަނަތައް ފެނުމުގެ ސަބަބުން މޮނިޓަރިންއަށް ލައިފައިވާ ރަށްރަށުގެ ތެރެއިން އިތުރު 5 ރަށެއް މޮނިޓަރިންގެ ހާލަތުން ނަގައިފިއެވެ.
މިއަދު މޮނިޓަރިންގެ ހާލަތުން ނަގައިފައިވާ ރަށްރަށަކީ މިދިޔަ އޯގަސްޓު މަހުގެ 19ވަނަ ދުވަހު މޮނިޓަރިންއަށް ލީ މ. މަޑުއްވަރީ، އޯގަސްޓު މަހުގެ 28 ވަނަ ދުވަހު މޮނިޓަރިންއަށްލީ އދ. މަހިބަދޫ އާއި ށ.ކަނޑިތީމު، އަދި މިދިޔަ މަހުގެ 31 ވަނަ ދުވަހު މޮނިޓަރިންއަށް ލައިފައިވާ ހދ. ނޮޅިވަރަމްފަރުގެ އިތުރުން އިއްޔެ މޮނިޓަރިން އަށް ލި ބ. ދޮންފަނެވެ.
މިއާ އެކު މިހާރު މޮނިޓަރިންގައި އޮތީ ޖުމްލަ 18 ރަށެކެވެ. މީގެ ތެރޭގައި ހިމެނެނީ ރ.ދުވާފަރު، އއ.ހިމަންދޫ، ކ.ގާފަރު، ޏ.ފުވައްމުލައް، ގދ.މަޑަވެލި، ލ.މުންޑޫ، ށ.މިލަންދޫ، ވ.ތިނަދޫ، ހދ. ނޮޅިވަރަމް، މ.ވޭވަށް، ސ.ހިތަދޫ، ސ.މަރަދޫ، ސ.މަރަދޫފޭދޫ، ސ.ފޭދޫ، ސ.ހުޅުމީދޫ، ރ.ރަސްމާދޫ، ގދ، ފަރެސްމާތޮޑާ އަދި ވ. ފުލިދޫއެވެ.
މީގެ ތެރެއިން އެންމެ ގިނަ ދުވަސްވަންދެން މޮނިޓަރިންގެ ހާލަތުގައި އޮތް ރަށަކީ މިދިޔަ މެއި މަހުގެ 25 ވަނަ ދުވަހު މޮނިޓަރިންއަށް ލާފައިވާ ރ. ދުވާފަރެވެ. އަދި އެންމެފަހުން މޮނިޓަރިންއަށް ލައިފައި ވަނީ މިމަހުގެ 7 ވަނަ ދުވަހު މޮނިޓަރިންއަށް ލީ ވ. ފުލިދޫއެވެ. މިމަހު މޮނިޓަރިންއަށް ލީ 4 ރަށެއް ލިސްޓުގައިވާއިރު އެންމެ ގިނަ ރަށްރަށް މޮނިޓަރިންއަށް ލައިފައި ވަނީ މިދިޔަމަހުގެ 28 ވަނަ ދުވަހުއެވެ.
18 ރަށެއް އަދިވެސް މޮނިޓަރިންގެ ހާލަތުގައިވާއިރު އެޗްޕީއޭއިން ކަނޑައެޅި މިންގަނޑަށް ވެކްސިން ފުރިހަމަކުރި އިތުރު ހަތް ރަށަކާ އެކު ޕީސީއާރު ނައްސި ނަތީޖާއަކާ ނުލައި ޖުމްލަ 35 ރަށަކަށް މިހާރު ދަތުރު ކުރެވޭ ގޮތަށް މިއަދު ވަނީ ހަމަޖައްސައިފައެވެ.
