ހުރިހާ ސްކޫލެއްގެ ބެލެނިވެރިންނަށް "ގްރީން ކާޑު" ދޫކޮށް ނިންމައިފި
ވެކްސިން ފުރިހަމަކޮށްފައިވާ ބެލެނިވެރިންނަށް "ގްރީން ކާޑު" ދޫކުރުމުގެ މަސައްކަތް ހުރިހާ ސްކޫލެއްގައި މިހާރު ނިމިފައިވާކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
ގްރީން ކާޑަކީ ސްކޫލްތަކަށް ދަރިވަރުން ބަލާ ދާ ބެލެނިވެރިންނަކީ ކޯވިޑް-19އިން ދިފާޢުވުމަށް ވެކްސިން ފުރިހަމަކޮށްފައި ތިބި ބައެއްކަން ކަށަވަރު ކުރުމަށް ޓަކައި އެޑިއުކޭޝަން މިނިސްޓްރީން ތަޢާރަފުކުރި ކާޑެކެވެ. މި ކާޑު ދޫކުރާނީ މިނިސްޓްރީއާ ސްކޫލްތައް ގުޅިގެންނެވެ.
ކޮވިޑް-19އާ ގުޅިގެން ސްކޫލްތަކުގެ ކިޔެވުން ގިނަ ދުވަސްތަކަކަށް މެދުކެނޑުނު ނަމަވެސް ރައްކާތެރިކަމުގެ ފިޔަވަޅުތަކާ އެކު މިހާރު އަލުން ސްކޫލްތަކަށް ގޮސްގެން ދަރިވަރުންގެ ކިޔެވުން ވަނީ ފަށައިފައެވެ. ދަރިވަރުންގެ ރައްކާތެރިކަން ކަށަވަރުކުރުމުގެ ގޮތުން އުމުރުން 12 އަހަރާއި 17 އަހަރާ ދެމެދުގެ ދަރިވަރުންނަށް ފައިޒަރ ވެކްސިން ޖެހުމުގެ މަސައްކަތް ފަށައިފައިވެއެވެ. ދަރިވަރުންނަށް ވެކްސިން ޖަހަން ފަށައިފައި ވަނީ އޯގަސްޓްމަހުގެ 15 ވަނަ ދުވަހުން ފެށިގެންނެވެ.
އެޑިއުކޭޝަން މިނިސްޓްރީން ވިދާޅުވީ މިހާތަނަށް ރާއްޖޭގެ 190 ސްކޫލެއްގެ 32500އަށް ވުރެ ގިނަ ދަރިވަރުން ވެކްސިންގެ ފުރަތަމަ ޑޯޒް ޖަހައިފައިވާ ކަމަށެވެ.
