ވިނަރެސް ފުލެޓްގެ މަސައްކަތް ލަސްވީ ކުރީ ސަރުކާރުގެ ސަބަބުން: އެޗްޑީސީ
"ވިނަރެސް" މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި އަޅަމުންދާ ފުލެޓުތަކުގެ މަސައްކަތް ނުނިމި ލަސްތަކެއް ވެގެން ގޮސްފައި ވަނީ ކުރީ ސަރުކާރުން އަމަލުކޮށްފައި އޮތް ގޮތުންކަމަށް ހައުސިން ޑިވެލޮޕްމަންޓް ކޯޕަރޭޝަނުން ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން އެޗްޑީސީގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވީ ކުރީ ސަރުކާރުން ވިނަރެސް މަޝްރޫއު ހިންގަން ހަވާލުކޮށްފައި ވަނީ އެޗްޑީސީގެ އުސޫލާއި ގައިޑްލައިންއާ ޚިލާފަށް ކޮމާޝަލް ޒޯނާއި ޕާކިން ޒޯނު ވެސް ނުހިމަނާ ކަމަށެވެ. މީގެ އިތުރުން ކުރީ ސަރުކާރުން ވިނަރެސް މަޝްރޫއަށް ނަންދީފައި ނުވާކަމަށާއި އެ މަޝްރޫއަށް ނަން ވެސް ދިނީ މި ސަރުކާރުން ކަމަށެވެ.
ސުހައިލް ވިދާޅުވީ ކޮމާޝަލް ޒޯނާއި ޕާކިން ޒޯނުގެ މަސައްކަތްތައް ކުރުމަށް އިތުރު ވަގުތު ނެގި ކަމަށާއި، އެހެންކަމުން މަޝްރޫއު ލަސްވެގެން ދިޔައީ ކަމަށެވެ.
ހުޅުމާލެ ދެވަނަ ފިޔަވަހީގައި ވިނަރެސް ފްލެޓުތަކުގެ 10 ޓަވަރު އަޅަން ވަނީ ނިންމައިފައެވެ. 2022އާ ހަމައަށް ފްލެޓުގެ އެންމެހާ މަސައްކަތްތައް ނިންމައިލެވޭނެ ކަމަށް އެޗްޑީސީން ވަނީ މީގެ ކުރިން ބުނެފައެވެ. މި ޓަވަރުތަކުގައި ހަތަރު ވައްތަރެއްގެ 1344 އެޕާޓްމަންޓް ހިމެނެއެވެ. އޭގެ ތެރޭގައި މެރީނާ ވިއު، އިނާ ވިއު، އައުޓާ ވިއު އަދި ސްޓޭންޑާޑް ވިއު ހިމެނޭނެއެވެ.
ސްޓޭންޑަޑް ވިއުގައި 883 އަކަފޫޓުގެ އެޕާޓްމެންޓްތައް ހުންނާނެ ކަމަށާއި، ދެން ހުރި އެޕާޓްމަންޓްތަކުގައި 902 އަކަފޫޓް ހުންނާނެ ކަމަށް އެޗްޑީސީން ވަނީ ބުނެފައެވެ. އަދި ހުރިހާ އެޕާޓްމެންޓެއްގައި ވެސް ތިން ކޮޓަރިއާއި ތިން ފާހާނާ އަދި ބެލްކަނި ހުންނާނެ ކަމަށް ވެސް އެޗްޑީސީން ވަނީ ބުނެފައެވެ.
ނަންދެވިދާނެ ދެންއަންނަ ސަރުކާރަކަށްވެސް އެކަމަކު އެއީ ޔާމީނު ސަރުކާރުން ބިޑްކޮށް މަސަށްކަތް ފަށާފައިވާ ފުލެޓްތަށް ވަރަށް ވަރަށް ސާފް އިނގޭތޯ
މަކަރުވެރިކަމުން ހައްދު ފަހަނައަޅާފައިވާ ވެރިން ތިބި ސަރުކާރެއް
އަބަދު ވެސް ރައްޔެތުން ހިތްހަމަ ނުޖެހޭ ގޮތަކަށް ކަމެއް ވެއްޖެއްޔާ ކުރީ ސަރުކާރު.. ކިޔަވާ ކުދީންގެ ފޮތްތަކުން ކުއް ފެންނަން ފެށީމަވެސް ކުރީ ސަރުކާރު. ކޮބާ އަމިއްލަ ޒިންމާ!!ކުރީ ސަރުކާރު ކިޔަމުންދާއިރު ކުރީ ސަރުކާރާ ނުލައި އެެއްވެސް ކަމެއް އަދި ނުވޭދޯ؟ ކުރީ ސަރުކާރުން ފަށާފައި ހުރި މަސައްކަތްދޯ!!!!