ފުރިހަމަ އަޣުލަބިއްޔަތު ނުލިބުނު ނަމަވެސް ޓުރޫޑޯ ތިންވަނަ ފަހަރަށް ބޮޑުވަޒީރުކަމަށް
ފުރިހަމަ އަޣުލަބިއްޔަތު ނުލިބުނު ނަމަވެސް ކެނެޑާގެ ބޮޑުވަޒީރު ކަމަށް ތިންވަނަ ފަހަރަށް ޖަސްޓިން ޓުރޫޑޯ ހޮވިއްޖެއެވެ.
ކެނެޑާގެ އާއްމު އިންތިހާބުގެ ވޯޓުގެ ނަތީޖާ މިހާތަނަށް ދައްކާގޮތުގައި ޓުރޫޑޯ ނިސްބަތްވެ ވަޑައިގަންނަވާ ލިބަރަލް ޕާޓީން ވަނީ އެގައުމުގެ ގާނޫނު ހަދާ މަޖިލީހުގެ 338 ގޮނޑީގެ ތެރެއިން 158 ގޮނޑި ކާމިޔާބުކޮށްފައެވެ. އެގައުމުގެ މައި އިދިކޮޅު ޕާޓީކަމުގައިވާ ކޮންޒަވޭޓިވް ޕާޓީއަށް ލިބިފައި ވަނީ 119 ގޮނޑިއެވެ. ބީކިއު ޕާޓީން 34 ގޮނޑި ކާމިޔާބު ކޮށްފައިވާއިރު އެންޑީޕީއިން 25 ގޮނޑި އަދި ޖީއާރުއެންއިން މިހާތަނަން ވަނީ 2 ގޮނޑި ކާމިޔާބުކޮށްފައެވެ.
ކެނެޑާގެ ހައުސް އޮފް ކޮމަންސް ނުވަތަ ގާނޫނު ހަދާ މަޖިލީހުގެ މެޖޯރިޓީ ކާމިޔާބު ކުރުމަށް 170 ގޮނޑި ކާމިޔާބު ކުރަން ޖެހެއެވެ.
ޓުރޫޑޯގެ ކާމިޔާބާ އެކު އިދިކޮޅު މައި ޕާޓީކަމުގައިވާ ކޮންޒަވޭޓިވް ޕާޓީގެ ލީޑަރ އެރިން އޮޓޫލޭ ވަނީ ބަލި ގަބޫލު ކުރައްވައި ޓުރޫޑޯއަށް މަރުހަބާ ކިޔުއްވައިފައެވެ.
އުމުރުން 49 އަހަރުގެ ޓުރޫޑޯ ކެނެޑާގެ ބޮޑުވަޒީރުކަމާ ފުރަތަމަ ފަހަރަށް ހަވާލުވެވަޑައިގަންނަވައިފައި ވަނީ 2015ވަނަ އަހަރުގައެވެ. ޓުރޫޑޯގެ ސިޔާސަތުތަކުގެ ސަބަބުން ކެނެޑާއަށް ބޮޑެތި ކުރިއެރުންތަކެއް އައިސްފައިވާކަމަށް އެގައުމުގެ ރައްޔިތުން ގަބޫލު ކުރާ ކަމަށާއި އޭނާއަކީ އެގައުމުގެ ރައްޔިތުންގެ އިތުރުން ބައިނަލްއަގުވާމީ މުޖްތަމައުގެ ލޯބި ލިބިފައިވާ ލީޑަރެއްކަމުގައި ޓުރޫޑޯ ނިސްބަތްވެ ވަޑައިގަންނަވާ ލިބަރަލް ޕާޓިީން ބުނެއެވެ. އަދި ނަސްލީ ތަފާތު ކުރުމާ ދެކޮޅަށް އޭނާގެންގުޅޭ ސިޔާސަތަކީ އޭނާއާ އިދިކޮޅު ފަރާތްތަކުން ވެސް ބަލައިގަނެފައިވާ ސިޔާސަތުތަކެއް ކަމަށް ބުނެފައި ވެއެވެ.
