ރަހީނު ކުރި މައްސަލައިގައި ދައުވާ ލިބޭ މީހުން ދޫކޮށްލަން ނިންމި ނިންމުން ގޯސް: ހައިކޯޓު
ކުޅުދުއްފުށީގައި މީހަކު ރަހީނުކޮށް އަނިޔާކުރި މައްސަލައިގައި، ދައުވާ ލިބޭ ދެ މީހުން ދޫކޮށްލަން އެ ރަށު މެޖިސްޓްރޭޓު ކޯޓުން ނިންމި ނިންމުން ގޯސްކަމަށް ހައި ކޯޓުން ނިންމައިފިއެވެ.
މި މައްސަލައިގައި ދައުލަތުން ދައުވާކޮށްފައި ވަނީ އެ ރަށު މާތުނޑި/ މުއާޒް އަލީއާއި ސެޓްލައިޓް/ މުހައްމަދު އާދަމްގެ މައްޗަށެވެ. މި ދެ މީހުންގެ މައްޗަށް ތުހުމަތު އުފުލިފައި ވަނީ އުމުރުން 29 އަހަރުގެ މީހަކު ގަދަކަމުން ކާރަކަށް އަރުވައިގެން ގެންގޮސް އަނިޔާ ކުރިކަމަށެވެ.
މި މައްސަލައިގައި ދައުވާ އުފުލިފައިވާ މުއާޒު އަލީއާއި މުހައްމަދު އާދަމް ހައްޔަރުކޮށް އެ މީހުންގެ ބަންދު އެކި ފަހަރު މަތިން އިތުރުކުރަމުން ގޮސް، ޝަރީއަތް ނިމެންދެން ބަންދު ކުރަން އެންމެ ފަހުން އެދުމުން، ކުޅުދުއްފުށި މެޖިސްޓްރޭޓު ކޯޓުން ނިންމީ އެ ދެ މީހުން ދޫކޮށްލުމަށެވެ. އެގޮތުން ކުޅުދުއްފުށީ ކޯޓަށް ފެނުނީ އެމީހުން ބަންދުގައި ބައިތިއްބަން ޖެހޭ އިތުރު ސަބަބެއް ނެތް ކަމަށެވެ.
ކުޅުދުއްފުށީ ކޯޓުގެ ހުކުމް ދައުލަތުން ހައި ކޯޓުގައި އިސްތިއުނާފު ކުރުމުން އެ ކޯޓުން އިއްޔެ ހުކުމް ކުރީ ކުޅުދުއްފުށީ ކޯޓުގެ ނިންމުން ގޯސް ކަމަށެވެ.
