ވިސާއާ ނުލައި އިންޑިއާއަށް ދަތުރު ކުރެވޭ ގޮތަށް ހަމަޖައްސައިފި!
ވިސާއާ ނުލައި ރާއްޖެއިން އިންޑިއާއަށް ދަތުރު ކުރެވޭ ގޮތަށް ހަމަޖައްސައިފިއެވެ.
އަވައްޓެރި އިންޑިއާއަށް ދަތުރު ކުރަން ދެން ދިވެހިންނަށް ވިސާ ނަގަން ނުޖެހޭނެކަމަށް އިންޑިއަން ހައި ކޮމިޝަނުން އެންގީ މީގެ ކުޑަ އިރުކޮޅެއް ކުރިންނެވެ.
އެ ކޮމިޝަނުން ކުރި ޓްވީޓެއްގައި ބުނެފައި ވަނީ މި މަހުގެ 15އިން ފެށިގެން ރާއްޖެއިން އިންޑިއާއަށް ބޭސް ފަރުވާ ކުރުމަށާއި، ވިޔަފާރީގެ ބޭނުންތަކަށް އަދި ފަތުރުވެރިންގެ ގޮތުގައި ދަތުރު ކުރަން ވިސާ ނަގަން ނުޖެހޭނެ ކަމަށެވެ.
ކޮވިޑްގެ ހާލަތާ ގުޅިގެން އިންޑިއާއަށް އެތެރެވުން މަނާކޮށް އެޅި ފިޔަވަޅުތައް ނިމުމަކަށް ގެނެސް، އެ ޤައުމު އެންމެ ފުރަތަމަ ހުޅުވައިލި ޤައުމަކީ ދިވެހި ރާއްޖެ ކަމަށް ވެސް ހައި ކޮމިޝަނުން ބުނެފައިވެއެވެ.
ކޮވިޑާ ގުޅިގެން ބޭރު ޤައުމުތަކަށް އިންޑިއާ ބަންދު ކުރީ މިދިޔަ އަހަރުގެ މާރިޗް މަހުން ފެށިގެންނެވެ.
ރާއްޖެއިން އިންޑިއާއަށް ވިސާއާ ނުލައި ދަތުރު ކުރެވޭނެ ގޮތަށް 2018ވަނަ އަހަރު ހަދައިފައިވާ އެއްބަސްވުން އަލުން ދަމަހައްޓަން އެ ޤައުމުން ނިންމުމާ ގުޅިގެން، ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވަނީ އުފާ ފާޅުކުރައްވައިފައެވެ.
Ads by STO
