ޖިންސީ ގޯނާގެ 40 މައްސަލައެއްގައި 30 މުވައްޒަފަކު ވަނީ ވަޒީފާއިން ވަކިކޮށްފައި: މިނިސްޓަރ
ޖިންސީ ގޯނާގެ 40 ވަރަކަށް މައްސަލަ މިހައިތަނަށް ހުށަހެޅި ބެލިފައިވާ ކަމަށާއި، އޭގެ ތެރެއިން 30 މުވައްޒަފަކު ވަޒީފާއިން ވަކިކޮށްފައިވާ ކަމަށް އެޑިއުކޭޝަން މިނިސްޓަރ ޑރ.އައިޝަތު އަލީ ވިދާޅުވެއްޖެއެވެ.
މިނިސްޓަރ ވިދާޅުވީ ޖިންސީ ގޯނާގެ މައްސަލަތަކަކީ ވަރަށް ގާތުން ބަލާ މައްސަލަތައް ކަމަށާއި މިހާރު ވެސް 7 ވަރަކަށް މައްސަލަ ކުރިއަށްދާ ކަމަށެވެ. އަދި މިފަދަ މައްސަލަތަކުގައި 30 މުވައްޒަފަކު ވަޒީފާއިން ވަކިކޮށްފައިވާކަމަށް ވެސް މިނިސްޓްރީން ވިދާޅުވިއެެވެ.
މިނިސްޓަރ ވިދާޅުވީ ތައުލީމު އުނގަންނާ ތަންތަނަކީ ކުދިންނަށް ރައްކާތެރި ތަނަކަށް ހެދުމަށް މިނިސްޓްރީން ކެނޑިނޭޅި މަސައްކަތް ކުރާނެ ކަމަށެވެ. މީގެ ކުރިން ވެސް ޖިންސީ ގޯނާގެ ގިނަ މައްސަލަތަކެއް ފެންމަތިވި ނަމަވެސް އަޅައި ނުލާ ދޫކޮށްލެވިފައި ހުރިކަމަށް ވެސް މިނިސްޓަރ ވިދާޅުވިއެވެ.
މި ފަހުން ގަލޮޅު މަދަރުސާގައި ހިނގި ހާދިސާއަކީ ވަރަށް ސީރިއަސް މައްސަލައެއްގެ ގޮތުގައި ބަލަމުންދާ މައްސަލައެއްކަމަށް މިނިސްޓަރ ފާހަގަ ކުރެއްވިއެެވެ. އެ މައްސަލައިގައި ޝާމިލުވާ މީހާ ވެސް މިހާރު ހައްޔަރު ކުރެވިފައިވާކަމަށް މިނިސްޓަރ ވިދާޅުވިއެވެ.
ޖިންސީ ގޯނާގެ މި މައްސަލައާ ގުޅިގެން، ދަރިވަރުން ފާޚާނާއަށް ފޮނުވުމުގައި، ހަވާލު ކުރާ ފަރާތް އެނގޭނެ ފަދަ ގޮތަކަށް ކަންތައް ކުރުމަށް އެޑިއުކޭޝަނުން އިއްޔެ ސްކޫލުތަކަށް ވަނީ އަންގައިފައެވެ. މީގެ އިތުރުން ޖިންސީ ގޯނާގެ މައްސަލަ ފެންމަތިވި ސްކޫލުގެ ހުރިހާ ، މަސައްކަތު މީހުން ވަނީ މަޤާމުގެ މަސްއޫލިއްޔަތުން ދުރުކޮށް، ސްކޫލުގައި ސީސީޓީވީ ކެމެރާ ހަރުކުރަން ނިންމައިފައެވެ.
Ads by STO
