ޑްރަގްގެ ބޮޑު މައްސަަލައެއްގައި އިންޑިއާއިން ދިވެއްސަކު ހޯދަނީ
އިންޑިއާގެ ފުލުހުން ތަހުގީގު ކުރަމުންދާ ޑްރަގްގެ ބޮޑު މައްސަލައެއްގައި ތުހުމަތުވާ ދިވެއްސަކު ހޯދަން ފަށައިފިއެވެ.
އޭނާ ހޯދުމަށް އިންޓަޕޮލް ރެޑް ނޯޓިސް ނެރެފައި ވަނީ ގިނަ އަދަދަކަށް ކެނަބިސް އުފައްދައި ވިޔަފާރި ކުރުމުގެ މައްސަލައަކާ ގުޅިގެންނެވެ.
މި މައްސަލާގައި ހޯދަމުން ދަނީ އުމުރުން 31 އަހަރުގެ އަލީ ރަޝީދު ކިޔާ މީހެކެވެ. އޭނާއަށް އަލީ ރަޝީދުގެ އިތުރުން އަޒްލީފް މުޙައްމަދު ވެސް ކިޔާ ކަމަށް އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަންއިން ބުނެއެވެ.
މި މައްސަލައާ ގުޅިގެން އަލީ ރަޝީދު ހޯދުމަށް ރެޑް ނޯޓިސް ނެރެފައިވާ ތާރީޚް ޔަގީން ކުރެވިފައި ނުވެއެވެ.
މީގެ ކުރިން ވެސް މިފަދަ މައްސަލަތަކުގައި ދިވެހިން ހޯދުމަށް ރެޑް ނޯޓިސް ނެރެފައިވެއެވެ. އޭގެ ތެރޭގައި މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމުގެ ތުހުމަތުގައި ސީލައިފްގެ މެނޭޖިން ޑިރެކްޓަރު އަހްމަދު މޫސާ (އަންމަޓީ) ހޯދަން ވެސް ރެޑް ނޯޓިސް ނެރެފައިވެއެވެ.
