އެއްފަހަރާ 5 ކުދިންނަށް ވުރެ ގިނަ ކުދިންނަށް ޓިއުޝަންދޭ ނަމަ ރަޖިސްޓްރީކުރުން ލާޒިމްކޮށްފި
އެއްފަހަރާ އެއްތަނެއްގައި 5 ކުދީންނަށް ވުރެ ގިނަ ކުދީންނަށް ކިޔަވައިދޭ ނަމަ އެއީ ޓިއުޝަން ކްލާހެއްކަމަށް ކަނޑައަޅައިއި އެފަދަ ތަންތަން ދެމަސްދުވަހުގެ ތެރޭގައި ރަޖިސްޓްރީ ކުރުން ލާޒިމްކޮށްފިއެވެ.
މިގޮތަށް ލާޒިމްކޮށްފައި ވަނީ، މިހާރު ގެޒެޓްކޮށްފައިވާ ސުކޫލު ފިޔަވައި ކިޔަވައިދޭ އެ ނޫން ތަންތަން ރަޖިސްޓަރީ ކުރުމާއި ހިންގުމުގެ ގަވާއިދުގެ ދަށުންނެވެ. މިގަވާއިދުގެ މަޤްޞަދަކީ، ސްކޫލުތައް ފިޔަވައި ކިޔަވައިދޭ އެ ނޫން ތަންތަން ދިވެހިރާއްޖޭގައި ރަޖިސްޓްރީ ކުރުމާއި ހިންގުމުގައި ޢަމަލުކުރާނެ އެންމެހައި އުސޫލުތައް ބަޔާންކުރުމެވެ.
މި ޤަވާއިދުގެ ދަށުން ރަޖިސްޓްރީ ކުރަންޖެހޭ ތަންތަނުގެ ތެރޭގައި ބޭބީ ނާސަރީއާއި ނާސަރީއަށް ކިޔަވައިދޭ ތަންތަން، ޕްރީ ސްކޫލާއި ޅަފަތުގެ ތަޢުލީމުގެ ބޭނުމަށް ހިންގާ އެ ފެންވަރުގެ ތަންތަން، ޓިއުޝަންދޭ ތަންތަން، ޤުރުއާން ކްލާސްތައް އަދި ޚާއްސަ އެހީއަށް ބޭނުންވާ ކުދިންނަށް ތަޢުލީމާއި ތަމްރީންދޭ ތަންތަން ހިމެނެއެވެ.
މީގެ އިތުރުން 18އަހަރުން ދަށުގެ ކުދިންނަށް ދެވޭ ތަޢުލީމާއި ތަމްރީނާއި ހުނަރު ފޯރުކޮށްދިނުމަށް ހިންގާ އެހެނިހެން ތަންތަނާއި އޮންލައިންކޮށް ކިޔަވައިދޭ ތަންތަނާއި ދަރިވަރުން ހާޒިރުކޮށްގެން ކިޔަވައިދޭ ތަންތަން ވެސް މި ޤަވާއިދުގެ ދަށުން ރަޖިސްޓްރީ ކުރަންޖެހޭ ތަންތަނުގެ ތެރޭގައި ހިމެނެއެވެ.
