މަރުހޫމް ހުސައިން ވަހީދުގެ ފަހު ވާހަކަކޮޅު މަސްވެރިންގެ ހައްގުގައި

ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސައިން ވަހީދު ރޭގެ ވަގުތެއްގައި ވަނީ އަވާހަރަވެފައެވެ. ކެންސަރު ބަލީގެ އާލާސްކަންފުޅެއްގައި ގިނަ ދުވަސްތަކެއް ވަންދެން އުޅުއްވި އިރު އޭނާ ވަނީ ރާއްޖެއިން ބޭރުން ފަރުވާ ހޯއްދެވުމުގައި ވެސް ގިނަ ދުވަސްތަކެއް ހޭދަކުރައްވައިފައެވެ. އޭގެ ފަހުން މިއަހަރުގެ ކުރީކޮޅު މާލެ ވަޑައިގެން އޭޑީކޭއިން ފަރުވާ ހޯއްދަވަން ފެއްޓެވިއެވެ. އެހެން ނަމަވެސް އޭރު ވެސް ހުސައިން ވަހީދު އުޅުއްވީ ވޭނުގައިކަމަށް އޭނާ އޭރު ވިދާޅުވިއެވެ.

Ads by Hajj Corporation

މަޑުމައިތިރި އޯގާތެރި ބޭފުޅެއް

މަރުހޫމް ހުސައިން ވަހީދަކީ ވަރަށް މަޑުމައިތިރި މިޒާޖެއްގެ އޯގާތެރި ބޭފުޅެއްގެ ގޮތުގައި އޭނާ ދަންނަ ގިނަ ބޭފުޅުން ސިފަކުރައްވައެވެ. އެގޮތުން އޭނާއަކީ އެންމެންނާ ވެސް ވަރަށް ގުޅޭ މީހެކެވެ. ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވި ގޮތުގައި ހުސައިން ވަހީދަކީ ހިތްހެޔޮ ހިތްތިރި ހިދުމަތްތެރިއެކެވެ. އަދި އެންމެ އުނދަގޫ ބިރުވެރި ދުވަސްތަކުގައި ވެސް ހުސައިން ވަހީދު އެމްޑީޕީއަށް ދީލަތިކަން ފޯރުވައިދިން ކަމަށް ވިދާޅުވިއެވެ.

"އެމްޕީ ހުސައިން ވަހީދު ފާހަގަވީ މަޖިލިސްއިން ދިމާވި ނުހަނު ހިތްހެޔޮ އަދި ބޭބެއެއް ފަދައިން ރަނގަޅު ނަސޭހަތް ދެއްވި ބޭފުޅެއްގެ ގޮތުގައި" މެމްބަރު ޔާސިރު އަބްދުއްލަތީފު ވިދާޅުވިއެވެ.

މީގެ އިތުރުން އެމްޑީޕީގެ ޕީޖީ ލީޑަރު އަލީ އާޒިމް ވިދާޅުވީ ހުސައިން ވަހީދަކީ 17 އަދި 19 ވަނަ ރައްޔިތުންގެ މަޖިލީހުގައި ވެސް ގިނަގުނަ ހިދުމަތްތަކެއް ކުރެއްވި ބޭފުޅެއް ކަމަށެވެ.

ރައީސް އިބްރާހިމް މުހައްމަދު ޞާލިހުގެ އަނބިކަނބަލުން ފަޒުނާ އަހުމަދު ވިދާޅުވީ ހުސައިން ވަހީދުގެ ވާހަކަ އައްސަވާ ކޮންމެ ފަހަރަކު ރައީސް ޞާލިހު ވިދާޅުވަނީ އެއީ ވަރަށް އޯގާތެރި ބޭފުޅެއް ކަމަށެވެ. އަދި ކޮމަންޑޫ ދާއިރާއަށް އެންމެ ފަހުން ކުރެއްވި ދަތުރުފުޅުގައި ހުސައިން ވަހީދާ ބައްދަލުވުމުން އުފާ ކުރައްވާ ކަމަށާއި އެއީ ވަރަށް ހިތްހެޔޮ ބޭފުޅެއްކަމަށް ވެސް ފަޒްނާ ވިދާޅުވިއެވެ.

މީގެ އިތުރުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މެންބަރު ހުސައިން ވަހީދަކީ ސަރުކާރު ހިންގާ މައި ޕާޓީ، އެމްޑީޕީގެ ވަރުގަދަ ތަނބެއް ކަމަށެވެ. އަދި އޭނާއަކީ ރާއްޖޭގެ ގިނަ ސިޔާސީ ޕާޓީ އެކުލެވޭ، ޑޮމޮކްރަސީގެ ނިޒާމަށް ވެރިކަން އަނބުރައިލުމުގައި ބޮޑު ދައުރެއް އަދާ ކުރެއްވި އިހްލާސްތެރި ބައިވެރިއެއް ކަމަށް ވެސް ވިދާޅުވިއެވެ.

މަޖިލިހުގެ ތަޅުމުގައި ދެއްކެވި އެންމެ ފަހު ވާހަކަފުޅު

މަރުހޫމް ހުސައިން ވަހީދު ރާއްޖެއިން ބޭރުގައި ފަރުވާ ހޯއްދެވުމުގައި ދުވަސްތައް ހޭދަކުރެއްވުމަށް ފަހު ރާއްޖެ ވަޑައިގެން މަޖިލީހުގެ އެއް ޖަލްސާއަށް ހާޒިރުވެވަޑައިގެންނެވިއެވެ. މިދިޔަ މާޗު މަހުގެ ތެރޭގައި އެޖަލްސާއަށް ހާޒިރުވެވަޑައިގެން އެންމެ ފުރަތަމަ ވެސް އަދާކުރެއްވީ ޝުކުރެވެ.

"އަޅުގަނޑު އެންމެ ފުރަތަމަ ވެސް ވަރަށް ގިނަ ދުވަސް ރާއްޖެއިން ބޭރުގައި ބޭސްފަރުވާއެއް ކުރަމުން މިއަދު މިހިސާބަށް އައިސް އަނެއްކާ ވެސް ތިއެންމެ ބޭފުޅުންނާ ބައްދަލުވެ، އެއްޗެއް ބުނެލަން ލިބުމުން އަޅުގަނޑު ހަމަ މާތްﷲ ސުބުހާނަހޫ ވަތައާލާއަށް ހަމްދާއި ޝުކުރު ކުރަން" އިސްޖަހައިލައްވަމުން ހުސައިން ވަހީދު އެ ދުވަހު ވިދާޅުވިއެވެ.

މަރުހޫމް ހުސައިން ވަހީދު އެންމެ ފަހުން ހާޒިރުވި މަޖިލިސް ޖަލްސާގައި ވާހަކަ ދައްކަވަނި

ބޭރުގައި ހޭދަކުރެއްވި ދުވަސްތަކުގައި ހާލު ބެއްލެވި މަޖިލީހުގެ ހުރިހާ މެމްބަރުންނަށާއި، ދާއިރާގެ ރައްޔިތުންނަށް ވެސް ހުސައިން ވަހީދު ޝުކުރު އަދާކުރެއްވިއެވެ. އަސަރާ އެކު ހުސައިން ވަހީދު ވިދާޅުވީ ހެޔޮ ދުއާ ކޮށްދެއްވަމުން ގެންދަވާ އެންމެހައި އަޚުންނާއި އުޚުތުންނަށް ޝުކުރު އަދާކުރައްވާ ކަމަށެވެ.

އެއަށް ފަހު އެ ދުވަހުގެ ޖަލްސާގެ މައުޟުއަށް އޭނާ އެނބުރިލެއްވިއެވެ. އެގޮތުން އެ ދުވަހު ހުށަހެޅިފައި އޮތް މަސްވެރިކަމުގެ ގާނޫނަށް އިސްލާހު ގެނައުމުގެ ބިލަށް ތާއީދުކުރައްވައި ހުސައިން ވަހީދުގެ ވާހަކަފުޅު ކުރިއަށް ގެންދެވިއެވެ. ކޮވިޑުގެ ދުވަސްވަރު މަސްވެރިންނަށް ދިމާވެފައިވާ ގޮންޖެހުންތަކާ ގުޅޭ ގޮތުން ވާހަކަދެއްކެވިއެވެ.

"އެހެން ނަމަވެސް އަޅުގަނޑުމެން އުއްމީދުކުރަނީ އިރާދަފުޅު ކުރެއްވިއްޔާ މި ނުރައްކާތެރި ކޮވިޑުގެ މިހިތްދަތި ދުވަސްވަރު ދިޔުމާ އެކު ރާއްޖެއިން ބޭރުގެ ބޮޑެތި ކުންފުނިތަކުން އަޅުގަނޑުމެން ބޭނުންވި ކަހަލަ އިންވެސްޓްމެންޓުތައް ހަދައި އަނެއްކާ ވެސް ރާއްޖޭގެ މަސްވެރިކަން ކުރިއަށްދާނެ ކަމަށް" ހުސައިން ވަހީދު ވިދާޅުވިއެވެ.

މީގެ އިތުރުން ވިދާޅުވީ ފަތުރުވެރިކަމުގެ ސިނާއަތެކޭ އެއްގޮތަށް މަސްވެރިކަމުގެ ސިނާއަތް ވެސް ފުޅާވެގެންދާނެ އެތައް ކަމެއް ގާނޫނުތަކުން ފަހިކޮށްދެވެމުން ދާކަމަށެވެ. އެގޮތުން މައިގަނޑު ތިން ކަންބޮޑުވުމެއް މަސްވެރިންގެ އޮތްކަމަށް ވިދާޅުވެ ހުސައިން ވަހީދު ވަނީ އެކަންކަން ހައްލުކޮށްދެއްވުމަށް އެދިވަޑައިގެންފައެވެ.

މަސްވެރިންނަށް ހަމަ އަގު ހޯދައިދިނުމާއި، ރާއްޖޭގެ ކަނޑުގެ ސަރަހައްދުން އެހެން ގައުމުތަކުގެ މަސް ބޯޓު ފަހަރަށް މަސްވެރިކަން ނުކުރެވޭނެ ގޮތަށް ސަލާމަތީކަންކަން ހަމަޖެއްސުމުގެ އިތުރުން ރާއްޖޭގެ ކަނޑުތަކުގައި މިޔަރު ގިނަވެފައިވާ މައްސަލަ އޭނާ ފާހަގަކުރެއްވިއެވެ.

"އަޅުގަނޑު ނިންމައިލަމުން، އަޅުގަނޑުގެ ދާއިރާގެ ގިނަ ރައްޔިތުންނަކީ ވެސް ހަމަ މަސްވެރިންކަމަށް ވާތީ އަޅުގަނޑު އެބޭފުޅުންނަށް ހަނދާންކޮށް އަރުވަން ބޭނުން، އަޅުގަނޑުމެން މަސްވެރިން މަތިން ހަނދާން ނެތުނީކީ ނޫނޭ. މަސްވެރިންނަށް ހެޔޮ އަގު ހޯދުމަށް ޓަކައި ވަރަށް ގިނަ ގާނޫނުތަކެއް، ގަވާއިދުތަކެއް ހެދިފައި އެބަ ހުއްޓޭ" ހުސައިން ވަހީދު ވިދާޅުވިއެވެ.

ހުސައިން ވަހީދު ވިދާޅުވީ ކޮވިޑުގެ ބަލިމަޑުކަން ނެތި ދިޔުމުން ސަރުކާރަށް އާމްދަނީ ލިބޭނެ އިތުރު ދޮރުތައް ހުޅުވިގެންދާނެ ކަމަށެވެ. އެ ދުވަސްވަރަކީ ލޯކަލް ކައުންސިލް އިންތިހާބަށް ކެމްޕެއިން ކުރަމުންދިޔަ ދުވަސްވަރުކަމުން ހުސައިން ވަހީދު ވަނީ އެމްޑީޕީގެ ވައުދުތަކަށް ވެސް އަލިއަޅުއްވައިލައްވައިފައެވެ. އެގޮތުން ވިދާޅުވީ މަސްވެރިކަން ކުރިއެރުވުމަކީ އެމްޑީޕީގެ ފިކުރުކަމަށާއި އެ ޕާޓީއަކީ ރަށްރަށަށް ތަރައްގީ ގެނެސްދެވޭނެ ހަމައެކަނި ޕާޓީކަމަށެވެ.