ވަރަށް މަދުން ނޫނީ ނުފެންނަ ބާޒެއް މެސަޗޫސެސްޓުގެ ކޯރުން ފެނިއްޖެ
ވަރަށް މަދުން ނޫނީ ނުފެންނަ ބާޒެއް މެސަޗޫސެޓްސްގެ ކޯރެއްގެ ކައިރިން މިދިޔަ ހަފްތާގައި ވަނީ ފެނިފައެވެ.
"ސްޓެލަރސް ސީ އީގަލް" ފެނިފައި ވަނީ ތޯންޓަން ކޯރުގެ އައްސޭރިފަށުގައި ހުރި ގަހެއްގެ އިންދައެވެ. މެސަޗޫސެޓްސް ޑިވިޝަން އޮފް ފިޝަރީޒް އެންޑް ވައިލްޑްލައިފްއިން ފޭސްބުކްގައި މި ދޫނި ފެނުމާ ބެހޭ ގޮތުން ކޮށްފައިވާ ޕޯސްޓެއްގައި ބުނެފައި ވަނީ މި ދޫންޏަކީ އޭޝިޔާއިން ހިޖުރަކުރި ދޫންޏެއް ކަމަށް ބެލެވޭ ކަމަށެވެ.
ދުނިޔޭގެ އެންމެ ބޮޑު އެއް ރެޕްޓާސް ކަމަށްވާ "ސްޓެލަރސް ސީ އީގަލް"ގެ ބަރުދަނުގައި 20 ޕައުންޑް ހުންނައިރު، 8 ފޫޓާ ހަމައަށް ވިންގްސްޕޭން ހުރެއެވެ.
މެސަޗޫސެޓްސް ޑިވިޝަން އޮފް ފިޝަރީޒް އެންޑް ވައިލްޑްލައިފްއިން ވަނީ މި ދޫންޏާ ބެހޭ އިތުރު މައުލޫމާތު ވެސް ހިއްސާކޮށްފައެވެ.
"މި ދޫނި ފެނިފައި މި ވަނީ އޭގެ ގެ ކަމަށްވާ އޭޝިއާއާ އެތައްހާސް މޭލެއް ދުރުންނެވެ. ކަނޑުގެ މި ބާޒަކީ ދުނިޔޭގެ އެންމެ ބޮޑު ރެޕްޓާސްތަކުގެ ތެރޭގައި ހިމެނޭ ބާޒެކެވެ. 8 ފޫޓާ ހަމައަށްވާ ވިންގްސްޕޭން އަކާ އެކު 20 ޕައުންޑާ ހަމައަށް މީގެ ބަރުދަން ހުންނާނެއެވެ. މިއީ ހަމަ އަލަސްކާއާއި ކެނެޑާގައި ވެސް ފާހަގަކުރެވުނު އީގަލް ކަމަށްވުން އެކަށީގެންވެއެވެ."
މި ބާޒު ޓެކްސަސްއާއި އަލަސްކާއިން ވެސް ފެނިފައިވާކަމަށް ރިޕޯޓްކޮށްފައި ވެއެވެ.މެސަޗޫސެޓްސްއިން ފެނުމުގެ ކުރިން، މި ދޫނި އެންމެ ފަހުން ފެނިފައި ވަނީ ނޮވެމްބަރު މަހުގެ ކުރީކޮޅު ނޯވާ ސްކޯޝިއާއިންނެވެ.
