ރައީސް ނަޝީދާ ދެކޮޅަށް ހުށަހެޅި މައްސަލަ ނުބަލަން ފުލުހުން ނިންމައިފި
ޣައިރު ދީންތަކުގެ ޝިއާރުތައް ރައީސް ނަޝީދު ފަތުރާ ކަމަށް ބުނެ "ރައްޔިތުންގެ އިއްތިހާދު"ން ފުލުހަށް ހުށަހެޅި މައްސަލަ ނުބަލަން ފުލުހުން ނިންމައިފިއެވެ.
ފުލުހުން ވިދާޅުވީ ޖަމިއްޔަތުލްއިއްތިހާދުގެ ނަމުގައި ދިވެހި ފުލުހުންގެ ހިދުމަތަށް ހުށަހަޅައިފައިވާ ސިޓީގައި ބަޔާންކޮށްފައިވާ ކަންތައްތައް އެ ހިދުމަތުން ބެލިބެލުމުން ޖިނާއީ ތަހުގީގެއް ހިންގަން ޖެހޭ ފަދަ ކަމެއް ފާހަގަކުރެވިފައި ނުވާ ކަމަށެވެ. އެހެންކަމުން އެސިޓީގައި ބަޔާންކޮށްފައިވާ ކަންކަމާ ގުޅިގެން އެހިދުމަތުގެ ފަރާތުން ތަހުގީގެއް ކުރިއަށް ނުގެންދާނެ ކަމަށް ފުލުހުން ވިދާޅުވިއެވެ.
އަދި އެހިދުމަތުން ބެލިބެލުމުން ސިޓީ ހުށަހަޅައިފައި ވަނީ ދައުލަތުގެ އެއްވެސް އިދާރާއެއްގައި ރަޖިސްޓްރީކުރެވިގެން ހިންގާ ގާނޫނީ ސަހުސަކުންކަމުގައި ނުވާތީ އެސިޓީއާ މެދު އަމަލުކުރިގޮތް އެސިޓީ ފޮނުވި ފަރާތަށް އަންގައިފައި ނުވާނެ ކަމަަށް ފުލުހުން ވިދާޅުވިއެވެ.
އަދި އެސިޓީއާ މެދު އަމަލުކޮށްފައި ވާނީ އެ ހިދުމަތާ ހިއްސާކުރާ މައުލޫމާތުތަކާ މެދު އަމަލުކުރަމުންދާ އުސޫލުން ކަމަށާއި އިސްލާމްދީނާއި ހިލާފަށް ދިވެހިރާއްޖޭގައި ބައެއް ފަރާތްތަކުން ހިންގާ ކަންކަމަކީ އެހިދުމަތުން އިސްކަމެއްދީގެން ތަހުގީގުކުރަމުންދާ އަދި މުސްތަގުބަލުގައި ވެސް ތަހުގީގުކުރާނެ މައްސަލަތަކެއްކަމަށް ފުލުހުން ވިދާޅުވިއެވެ.
