ތިން ރަށެއްގައި ހޮސްޕިޓަލް އަޅައިދޭނެ ބަޔަކު ހޯދަނީ
އަތޮޅުތަކުގެ ތިން ރަށެއްގައި ކޮންޓްރެކްޓަރ ފައިނޭންސްގެ އުސޫލުން ހޮސްޕިޓަލް އަޅައިދޭނެ ބަޔަކު ހޯދުމަށް އިޢުލާންކޮށްފިއެވެ.
ހޮސްޕިޓަލް އަޅަން އިއުލާންކޮށްފައި ވަނީ ހއ. އިހަވަންދޫ، ނ. ކެނދިކުޅުދޫ، އަދި ޅ. ހިންނަވަރުގައެވެ.
ފިނޭންސް މިނިސްޓްރީން ކުރި އިއުލާނެއްގައި ބުނީ ތިން ޕްރޮޖެކްޓްގެ ބީލަން ހުޅުވުން އޮންނާނީ އަންނަ މަހުގެ 28ވާ ހޯމަ ދުވަހުގެ 13:00ގައި އެ މިނިސްޓްރީގައިކަމަށެވެ. އެ ހޮސްޕިޓަލްތައް ހަަދަން ޝަޢުގުވެރިވާ ދިވެހި ކުންފުނިތަކަށް މި މަޝްރޫއުތަކުގެ ބީލަމުގައި ބައިވެރިވެވެނީ ޕްލޭނިން މިނިސްޓްރީން އެކުލަވައިލައިފައިވާ "އިމާރާތްކުރުމުގެ ޢަމަލީ މަސައްކަތް ކުރާ ފަރާތްތަކުގެ ޤަވާއިދު"ގައިވާ ގޮތުގެމަތީން ރަޖިސްޓަރީވުމަށް މިނިސްޓްރީން ވަނީ ބުނެފައެވެެ.
އެއީ ވަކި ގުރޭޑްތަކަކަށް ޝަރުތު ހަމަވާ ކުންފުނިތަކަށް ކަމަށާއި ނަމަވެސް ބޭރުގެ ކުންފުންޏަކުން މި މަޝްރޫއުތަކުގެ ބީލަމުގައި ބައިވެރިވާ ނަމަ ޢިމާރާތްކުރުމުގެ އަމަލީ މަސައްކަތް ކުރާ ފަރާތްތަކުގެ ޤަވާއިދުގައި ރަޖިސްޓްރީ ވާން ނުޖެހޭނެ ކަމަށް މިނިސްޓްރީން ބުންޏެވެ.
އެ އިއުލާނުގައިވާގޮތުން ތިން ރަށުގައި ހޮސްޕިޓަލް އަޅަން ބިޑް ސެކިއުރިޓީގެ ގޮތުގައި 690،000 ރުފިޔާ ދައްކަން ޖެހެއެވެ. ބިޑް ސެކިއުރިޓީ ފައިސާ ދިވެހި ރުފިޔާއިން ނުވަތަ ޔޫއެސް ޑޮލަރުން ދެއްކޭނެ ކަމަށާއި އޭގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަސްކަމަށް ވެސް އެ އިޢުލާންގައިވެއެވެ.
އެ ތިން ރަށުގައި ހޮސްޕިޓަލް ގާއިމު ކުރުމަކީ މި ސަރުކާރުގެ ވައުދެކެވެ.
