އައިޝްވަރްޔާއާއި އަބީޝެކް އެންމެ ފުރަތަމަ ބައްދަލުވީ ތަފާތު ގޮތަކަށް!
އައިޝްވަރްޔާ ރާއީއާއި އަބީޝެކް ބައްޗަންއަކީ ބޮލީވުޑްގެ އެންމެ މަގްބޫލް އެއް ޖޯޑެވެ. މި ދެމީހުންގެ ކައިވެންޏަށް 14 އަހަރުވެފައިވާ އިރު، ދެމީހުންގެ އަންހެން ދަރިއަކު ވެސް މިހާރު ހުރެއެވެ.
މީގެ ކުރިން "ދަ ރަންވީރު ޝޯ"އަށް ދިން އިންޓަރވިޔުއެއްގައި އަބީޝެކް ވަނީ އޭނާއާއި އައިޝްވަރްޔާ އެންމެ ފުރަތަމަ ފަހަރަށް ދިމާވި ގޮތް ކިޔައިދީފައެވެ. އެގޮތުން އޭނާ ބުނީ، އައިޝްވަރްޔާ އެންމެ ފުރަތަމަ ފެނުނީ، އައިޝްވަރްޔާގެ އެންމެ ފުރަތަމަ ފިލްމު "އޯރް ޕިޔާރް ހޯގަޔާ"ގެ މަސައްކަތްތައް ކުރަމުން ދިޔަ ދުވަސްވަރު ކަމަށެވެ.
އެކްޓަރު ބޮބީ ޑިއޯލްއާއި އައިޝްވަރްޔާ ލީޑްރޯލުން ފެނިގެން ދިޔަ މި ފިލްމަކީ އައިޝްވަރްޔާގެ އެންމެ ފުރަތަމަ ފިލްމުވެސް މެއެވެ. ފިލްމުގެ ޝޫޓިންއަށް އައިޝްވަރްޔާމެން ސްވިޒަލެންޑްގައި އުޅެނިކޮށް، ބޮސްޓޮން ޔުނިވަރސިޓީން ކިޔަވާ ނިންމި ގޮތަށް "ޕްރޮޑަކްޝަން ބޯއި"އެއްގެ ގޮތުގައި މަސައްކަތް ކުރަމުން ދިޔަ އަބީޝެކްއާއި ދިމާވީ، އޭނާ ވެސް އެގައުމުގައި އުޅެނިކޮށެވެ.
ބޮބީއާ ދެމީހުން ކެއުމަކުން ބައްދަލު ކުރިއިރު، އެތަނުގައި އައިޝްވަރްޔާ ވެސް ހުއްޓެވެ. އަބީޝެކް ބުނީ އޭނާ އޭރު ގެންގުޅު އިނގެރޭސި އެކްސެންޓްގެ ސަބަބުން، އޭނާ ދެއްކި ވާހަކަ އެއްވެސް ވަރަކަށް ފަހުމް ނުވި ކަމަށް އައިޝްވަރްޔާ ފަހުން ބުނި ކަމަށެވެ.
"އަހަރެން ދެއްކީ ކޮން ވާހަކައެއްކަން ނޭނގިގެން އައިޝްވަރްޔާ ފަހުން ވެސް އެހި އޭރު އަހަރެން ކީ ކީކޭތޯ؟" އަބީޝެކް ބުންޏެވެ.
ކޮންމެއަކަސް، އައިޝްވަރްޔާއާއި އަބީޝެކްގެ އެންމެ ފުރަތަމަ ބައްދަލުވުމާ އެކު އެދެމީހުންގެ ދެމެދުގައި އެެއްވެސް ގާތްކަމެއް އުފެދިފައެއް ނުވެއެވެ. ބޮލީވުޑުން އައިޝްވަރްޔާއާއި އެންމެ ފުރަތަމަ ލޯބީގެ ގުޅުމެއް އުފެދުނީ ސަލްމާންހާންއާއެވެ. އޭގެ ފަހުން ވިވެކް އޮބްރޯއީއާ އޭނާއާ ދެމެދު ގުޅުމެއް އޮތް ކަމަށް ވެސް ވާހަކަ ދެކެވުނެވެ.
އަބީޝެކްއަށް ބަލާއިރު، އޭނާއާއި ކަރިޝްމާއާ ދެމެދު ގާތް ގުޅުމެއް އުފެދި، އެ ދެމީހުން ވަނީ އެންގޭޖް ވެސް ވެފައެވެ. ނަމަވެސް އެގުޅުން ނިމުމަކަށް އައި ފަހުން، ކަރިޝްމާ ވަނީ ވިޔަފާރިވެރިޔާ ސަންޖޭއާ ކައިވެނި ކޮށްފައެވެ.
