ފުލުހުންގެ 33ވަނަ ތަމްރީން ޕްރޮގްރާމް 58 ދަރިވަރުން ފުރިހަމަކޮށްފި
ފުލުހުންގެ 33ވަނަ ތަމްރީން ޕްރޮގްރާމްގެ އެންމެ ރަނގަޅު ދަރިވަރަކަށް ހއ.ދިއްދޫ، ލޫސިޔާ މުޙައްމަދު އިރުޝާދް ހޮވިއްޖެއެވެ.
ދ.ވާނީގައި ހުންނަ ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ 33ވަނަ ތަމްރީން ޕްރޮގްރާމްގައި 90 ދަރިވަރުން ބައިވެރިވެ، 58 ދަރިވަރުން ވަނީ ތަމްރީން ފުރިހަމަކޮށްފައެވެ. މި ތަމްރީނަކީ ފުލުހުންގެ ޚިދުމަތަށް ނިކުންނަ ފުލުހުންގެ ކިބައިގައި ހުންނަންޖެހޭ ތައުލީމާއި ޤާބިލިއްޔަތުތަކަށް ތަމްރީން ދިނުމަށް ކުރިއަށްގެންދާ ކޯހެކެވެ.
މި ރަސްމިއްޔާތުގައި ވަނީ އެކި ސްކޮޑްތަކުން ވަނަވަނައަށް އައި ދަރިވަރުންނާއި، އަދި އެންމެ މޮޅު ސްކޮޑަށް ހަނދާނީ ފިލަޔާއި ޝީލްޑް ހަވާލުކޮށްފައެވެ.
ކޯހުގެ އެންމެ މޮޅު 4 ދަރިވަރުންނަށް ހަނދާނީ ލިޔުން ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހުމާނު މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް އާއިޝަތު މުޙައްމަދު ދީދީއެވެ.
ފުލުހުންގެ 33ވަނަ ތަމްރީން ޕްރޮގްރާމްގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ކޯސް ފުރިހަމަކުރި ދަރިވަރުންނަށްވަ ނީ ޑިއުޓީ ބެޓްން އަރުވާފައެވެ. އަދި ފުލުހުންގެ އަޒުމް ވެސް ލައިދީފައިވެއެވެ.
މި ތަމްރީން ޕްރޮގްރާމަކީ މޯލްޑިވްސް ކޮލިފިކޭޝަން އޮތޯރިޓީގެ ލެވެލް 4 ފެންވަރުގެ ތަމްރީން ކޯހެކެވެ.
