ނެތިދިއުމުގެ ބިރުހީވެފައިވާ ދިރުންތަކުގެ ރެޑް ލިސްޓެއް އެކުލަވައިލަނީ
ރާއްޖޭގައި ދިރިއުޅޭ ދިރޭތަކެތީގެ ތެރެއިން ނެތިދިއުމުގެ ބިރުހީވެފައިވާ ދިރުންތައް ހިމާޔަތްކުރުމަށް ޓަކައި ފުރަތަމަ ފަހަރަށް ނެޝަނަލް ރެޑް ލިސްޓެއް އެކުލަވައިލުމުގެ މަސައްކަތް ފަށައިފިއެވެ.
އެންވަޔަރަންމަންޓް މިނިސްޓްރީން ވިދާޅުވީ މިމަސައްކަތަށް ބޭނުންވާ ކަމާ ގުޅޭ ފަންނީ ކޮމިޓީއެއް މިހާރު އެކުލަވައިލައިފައިވާ ކަމަށާއި ކޮމިޓީގެ ލަފާގެ މަތިން ތިން ބާވަތެއްގެ ދިރޭ ތަކެތި ވަޒަންކުރުމުގެ މަސައްކަތް ކުރަމުންދާ ކަމަށެވެ.
ދުނިޔެއިން ނެތި ހިނގައިދާނެކަމުގެ ބިރު ހީވެފައިވާ 80 ބާވަތްތަކެއްގެ ކަނޑުގެ ދިރުން ރާއްޖޭގެ ކަނޑުތަކުގައިވާ ކަމަށް ރާއްޖޭގެ ކަނޑުތަކާ ގުޅޭގޮތުން ހެދި ދިރާސާއަކުން މީގެ ކުރިން ވަނީ ދައްކައިފައެވެ.
މިކަން ދެނެގަނެވިފައި ވަނީ ރާއްޖޭގެ ކަނޑުތަކާ ގުޅޭ ގޮތުން ބްލޫ ޕްރޮސްޕަރިޓީ ކޯލިޝަންއާ އެކު ރާއްޖޭގެ މެރިންރިސަރޗް އިންސްޓިއުޓާއި މިނިސްޓްރީ އޮފް ފިޝަރީސް އެންޑް މެރިން ރިސޯސަސްއިން 2020ވަނަ އަހަރު ކުރިއަށްގެންދިޔަ ދިރާސާއެއްގައެވެ.
ނުރައްކާ ބޮޑު ބާވަތްތަކުގެ ރެޑްލިސްޓް ހިމާޔަތްކުރުމަށް އެކުލަވައިލައިފައިވާ ބައިނަލްއަގްވާމީ ޔޫނިއަންއަކީ ދިރޭތަކެތީގެ ނަސްލާއި، ފަންގަސް އަދި ގަސްގަހާގެހީގެ ބާވަތްތައް ދުނިޔެއިން ނެތިދިއުމުގެ ބިރު ހީވެފައިވާ ދިރޭތަކެތީގެ ނަސްލުތައް ހިމާޔަތްކުރުމަށް ދުނިޔޭގެ އެންމެ ފުޅާ ދާއިރާއެއްގައި މައުލޫމާތު ފަތުރާ ވަސީލަތެވެ.
ނުރައްކަލަށް ހުށަހެޅިފައިވާ ބާވަތްތަކުގެ ނެޝަނަލް ރެޑްލިސްޓަކީ ނެތިދިއުމުގެ ބިރު ހީވެފައިވާ ބާވަތްތަކުގެ ތަފާތު ލެވެލްތަކަށް ބާވަތްތައް ކެޓަގަރައިޒްކުރާ ލިސްޓެކެވެ. މި ލިސްޓަކީ އައި.ޔޫ.ސީ.އެން ގައިޑްލައިންތަކުގެ މައްޗަށް ބިނާކޮށް އެކުލަވައިލައިފައިވާ ލިސްޓެކެވެ. ނުރައްކަލަށް ހުށަހެޅިފައިވާ ބާވަތްތަކުގެ ލިސްޓް ބޭނުންކުރާނީ ދިރޭތަކެތީގެ ނަސްލު ތައް ހިމާޔަތްކުރުމާއި، މެނޭޖްކުރުމާއި، އެ ނޫން ވެސް ހިމާޔަތްކުރުމުގެ ފިޔަވަޅުތަކާ ގުޅޭގޮތުން ގައުމީ ފެންވަރުގައި ކަންކަން ނިންމުމަށެވެ.
Ads by STO
