މަސްތުވާތަކެތިން މިންޖުވާން، މުޅި މުޖްތަމައު އެހީވުމަކީ ގައުމީ ވާޖިބެއް: ޝަހީމް
މަސްތުވާތަކެތީގެ ވަބާއިން ސަލާމަތްވުމަށް ކުރާ މަސައްކަތުގައި މުޅި މުޖްތަމައު ގުޅިގެން މަސައްކަތް ކުރަން ޖެހޭ ކަމަށް ކުރީގެ އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ.ޝަހީމް ކުރެއްވި ޓްވީޓެއްގައި ވިދާޅުވީ މަސްތުވާތަކެތީގެ ސަބަބުން، ދިވެހި ގައުމުގެ މުޅި މުސްތަގްބަލަށް ހިޔަނި އެޅިގެން ދިޔުމަކީ އެންމެންނަށް ވެސް ލިބޭނެ ދެރައެއް ކަމަށެވެ. އަދި މި ވަބާއިން ޖީލު ސަލާމަތް ކުރުމަށް ޓަކައި، ކުރެވޭ ކޮންމެ މަސައްކަތަކަށް، މުޅި މުޖްތަމައު އެއްބާރުލުން ދިނުމަކީ ގައުމީ ވާޖިބަކަށް ހަދަން ޖެހޭ ކަމަށް ވެސް އޭނާ ވިދާޅުވިއެވެ.
މަސްތުވާތަކެތީގެ ވަބާގައި ޖެހޭ ޒުވާނުންނާއި، އެކި އުމުރުގެ މީހުން އިތުރުވަމުން އަންނައިރު، މިއީ އަންނަން އޮތް ޖީލުތަކަށް އޮތް ބޮޑު ނުރައްކަލެއް ކަމުގައި ގިނަ ބަޔަކު ސިފަ ކުރެއެވެ.
މާލޭގައި ހިންގާ ޑްރަގް ކެފޭތަކުން އާންމުކޮށް ޚިދުމަތް ހޯދާ 1118 ދިވެހީން ފާހަގަކުރެވިފައިވާ ކަމަށް ދިވެހި ފުލުހުންގެ ހިދުމަތުން އިއްޔެ ވަނީ ބުނެފައެވެ.
މަސްތުވާތަކެއްޗާ ދެކޮޅަށް ހިންގައިފައިވާ އޮޕަރޭޝަންތަކުގެ މައުލޫމާތު ދިނުމަށް ޑްރަގް އެންފޯސް ޑިޕާޓްމަންޓުން އިސްކަންދަރުކޮށީގައި ބޭއްވި މީޑިއާ އިވެންޓްގައި އެ ޑިޕާޓްމަންޓްގެ ހެޑް، ސުޕްރިޓެންޑެންޓް އޮފް ޕޮލިސް އަހުމަދު ޝާކިރު ވިދާޅުވީ، ޑްރަގް ކެފޭތަކަށް ވަންނަ މީހުންގެ ތެރެއިން މީހުންގެ ތެރެއިން 305 މީހުންނަކީ ޑުރަގް ފަރުވާއިން ވަކި ކޮށްފައިވާ މީހުން ކަމަށެވެ.
އަދި ރިހެބިލިޓޭޝަންގެ ފަރުވާ ދިނުމަށް އަމުރު ކޮށްފައިވާ 217 މީހަކާއި ދެވަނަ ހުކުމެއް އައިސްފައިވާ 141 މީހެއް މި ޚިދުމަތް ހޯދާ ކަމަށް ފުލުހުން ބުންޏެވެ.
Ads by STO
