ފުލުހުންގެ ޚިދުމަތާ އަލަށް ގުޅުނު ފުލުހުން ހުވާކޮށްފި
ދިވެހި ފުލުހުންގެ ޚިދުމަތާ އަލަށް ގުޅުނު ފުލުހުން ހުވާކުރުމުގެ ރަސްމިއްޔާތު ބާއްވައިފިއެވެ.
އިސްކަންދަރު ބިލްޑިންގގައި ބޭއްވި ރަސްމިއްޔާތުގައި ފުލުހުންނަށް ހުވާލައިދެއްވީ ފެމެލީ ކޯޓުގެ ގާޒީ ޢަލްއުސްތާޒާ ޒައީމާ ނަޝީދު އަބޫބަކުރެވެ.
ފުލުހުންނަށް ހުވާ ލައިދެއްވުމަށް ފަހު ރަސްމިއްޔާތުގައި ވާހަކަފުޅު ދައްކަވަމުން ޢަލްއުސްތާޒާ ޒައީމާ ނަޝީދު އަބޫބަކުރު ދެއްކެވި ވާހަކަފުޅުގައި، ފުލުހުންގެ ހުވަޔާ އެއްގޮތަށް މަސައްކަތްކޮށް، ގާނޫނާއި ގަވާއިދުތަކާ އެއްގޮތަށް އަމަލުކުރުމަށާ އަދި ފުލުހުންގެ ގާނޫނީ ވާޖިބު ފުރިހަމައަށް އަދާކުރުމަށް ނަސޭހަތްތެެރިވެލެއްވިއެވެ.
އިއްޔެގެ އެ ރަސްމިއްޔާތުގައި ހުވާކޮށްފައި ވަނީ ފުލުހުންގެ ޚިދުމަތާ އަލަށް ގުޅުނު 40 ފުލުހުންނެވެ. އެއީ 16 އަންހެން ފުލުހުންނާއި 24 ފިރިހެން ފުލުހުންނެވެ. ހުވާކުރުމަށް ފަހު ފުލުހުން ވަނީ ހުވާގެ ލިޔުމުގައި ސޮއިކޮށްފައެވެ.
އެ ރަސްމިއްޔާތުގައި، ހެޑް އޮފް ހިއުމަން ރިސޯސް ޗީފް ސްޕްރިންޓެންޑެންޓް އޮފް ޕޮލިސް އަހުމަދު ނާފިޒު ބައިވެރިވެވަޑައިގެންނެވިއެވެ.
Ads by STO
