ރައީސްކަމުގެ މަސްއޫލިއްޔަތުގެ ހުވާ ނައިބު ރައީސް ކުރައްވައިފި
ރައީސުލް ޖުމްހޫރިއްޔާކަމުގެ މަސްއޫލިއްޔަތު ވަގުތީ ގޮތުން ނައިބު ރައީސް ފައިސަލް ނަސީމްއާ ހަވާލު ކުރެއްވުމަށް ރައީސް އިބްރާހިމް މުހައްމަދު ޞާލިޙް ރޭ ނިންމެވުމާ ގުޅިގެން، އެ މަގާމުގެ މަސްއޫލިއްޔަތުގެ ހުވާ ފައިސަލް ނަސީމް މިއަދު ހެނދުނު ކުރައްވައިފިއެވެ.
ސިންގަޕޫރުގައި ހުންނަވައި ރައީސް ޞާލިޙް ރޭ ކުރެއްވި ޓްވީޓެއްގައި ވިދާޅުވީ، އެމަނިކުފާނުގެ ތައިރޮއިޑް އޮޕަރޭޝަނެއް ކުރެއްވުމަށް ޑޮކްޓަރުން ލަފާ ދެއްވައިފައި ވާތީ، ވަގުތީ ގޮތުން ރައީސްކަމުގެ މަސައްކަތްތަކުން އެކަހެރިވެވަޑައިގެން އެ މަސްއޫލިއްޔަތު ނައިބު ރައީސްއާ ވަގުތީ ގޮތުން ހަވާލު ކުރެއްވުމަށް ނިންމަވައި، އެކަން ރަސްމީކޮށް ރައްޔިތުންގެ މަޖިލީހުގެ ރައީސްއަށް ވެސް އަންގަވައިފައިވާނެ ކަމަށެވެ.
ރައީސްކަމުގެ މަސްއޫލިއްޔަތުގެ ހުވާ ނައިބު ރައީސް ފައިސަލް ނަސީމް ކުރެއްވީ މިއަދު ހެނދުނު 5:50 ގައެވެ.
މަޖިލީހުގެ އިދާރާގައި ބޭއްވި ރަސްމިއްޔާތެއްގައި ނައިބު ރައީސް ފައިސަލް ނަސީމަށް މަގާމުގެ ހުވާ ލައިދެއްވީ އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ. އެ މަނިކުފާނު ހުވާ ކުރެއްވި ރަސްމިއްޔާތުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވެސް ބައިވެރިވެވަޑައިގެންނެވިއެވެ.
ރާއްޖޭގެ ޤާނޫނު އަސާސީގެ 123 ވަނަ މާއްދާގެ (ހ)ގައި ވަނީ ރައީސުލްޖުމްހޫރިއްޔާއަށް އޭނާގެ މަގާމުގެ މަސްއޫލިއްޔަތުތަކާއި ވާޖިބުތައް އަދާކުރުމަށް ވަގުތީގޮތުން އުޒުރުވެރިވެއްޖެ ކަމަށް ގަބޫލުކުރެވިއްޖެ ނަމަ، ސަބަބު ބަޔާންކޮށް އެކަން ރައްޔިތުންގެ މަޖިލީހުގެ ރައީސަށް ލިޔުމަކުން އެންގެވުމަށް ފަހު އެ މަސްއޫލިއްޔަތުތަކާއި ވާޖިބުތައް އަދާކުރުމަށް ރައީސުލްޖުމްހޫރިއްޔާގެ ނައިބާ ހަވާލުކުރެވޭނެ ކަމަށެވެ. އަދި ރައީސުލްޖުމްހޫރިއްޔާއަށް އެ މަސްއޫލިއްޔަތުތަކަށް އަނބުރާ ދެން ވަޑައިގެންނެވޭނީ ވެސް، ލިޔުމަކުން އެކަން މަޖިލީހުގެ ރައީސަށް އެންގެވުމަށް ފަހުގައި ކަމަށް ގާނޫނު އަސާސީގައި އޮވެއެވެ.
މިއީ ރާއްޖޭގެ ރައީސުލްޖުމްހޫރިއްޔާއަކު އެ މަނިކުފާނުގެ މަސްއޫލިއްޔަތު ނައިބު ރައީސާ ހަވާލުކުރެއްވި ފުރަތަމަ ފަހަރެވެ.
ދެރައީސުން އުފެދުނީތޯ ؟
ބަލަ ނައިބު ރައީސު ހުވާ ނުކުރިޔަސް ރައީސުގެ މަސްއޫލިއްޔަތު އަދާ ކުރެވިދާނެ ރައީސު އޮޕަރޭޝަން ނިމެންދެކަށް ކޮންމެހެން ނައިބް ރައީސު ރައީސުކަމުގެ ހުވާނުކުރިޔަސް ! ނައިބު ރައީސުވެސް ހުންނަވަނީ ހުވަޔެއް ކުރައްވައިގެން ހުވައެއްގެ މަތީގަ !