އެމްޑީޕީއަށް ފިސާރި އަންހެން އެކްޓިވިސްޓުން އުފެއްދިއްޖެ، ދެން އޮތީ ވެރިން އުފެއްދުން: ރޮޒައިނާ
އެމްޑީޕީން "ފިސާރި" އަންހެން އެކްޓިވިސްޓުންތަކެއް އުފައްދައިފައިވާ ކަަމަށާއި، މިހާރު ކުރަން އޮތް ކަމަކީ ފިސާރި އަންހެން ވެރިން އުފެއްދުން ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަންހެނުންގެ ރޫހުގެ ރައީސާ ކަމަށް ވާދަކުރައްވާ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
"ހިންގާލަން" ކެމްޕެއިން ލޯންޗު ކުރުމަށް ރޭ ށ.މިލަންދޫގައި ބޭއްވި ޖަލްސާގައި ވާހަކަ ދައްކަވަމުން ރޮޒައިނާ ވަނީ އެމްޑީޕީގެ އަންހެނުންނަށް ސިޔާސީ ގޮތުން ކުރިއަށް ދިޔުމުގެ ފުރުސަތު ހޯދައިދިނުމަށް އޭނާއަށް ވޯޓު ދިނުމަށް އެދިވަޑައިގަންނަވާފައެވެ.
ރޮޒައިނާ ވިދާޅުވި ގޮތުގައި، އޭނާއަށް އެމްޑީޕީގެ އަންހެނުން ބާރުވެރި ކުރުވޭނެއެވެ.
"މިއަދު އަޅުގަނޑުމެން އަންހެނުން، އެކްޓިވިސްޓުންގެ ގޮތުގައި ތިބެގެންނެއް ފުއްދާލެވޭކަށް ނެތް." އޭނާ ވިދާޅުވިއެވެ.
ރޮޒައިނާ ވިދާޅުވީ ތައުލީމު ހާސިލުކޮށްގެން، ގޭގައި އިންދާ، މީހަކު އައިސް ސިޔާސީ މަގާމެއް ނުދޭނެ ކަމަށެވެ. މި ދާއިރާއިން ފުރުސަތު ލިބެނީ ސިޔާސީ ޕާޓީއަކާ އެކު ވަރަށް ބުރަކޮށް މަސައްކަތް ކޮށްގެންކަން ފާހަގަ ކުރައްވައި އޭނާ ވަނީ އެމްޑީޕީގެ އަންހެނުންގެ ރޫހުގެ ރައީސްކަން ލިބިއްޖެ ނަމަ، ސިޔާސީ ފުރުސަތުތައް ހަަމަހަމަކޮށް ހޯދައިދޭން މަސައްކަތް ކުރައްވާނެ ކަމަށް ވެސް ވައުދުވެވަޑައިގެންފައެވެ.
"އަޅުގަނޑަށް އެމްޑީޕީގެ އަންހެނުންގެ ރޫހުގެ ރައީސްކަން ލިބިއްޖެ ނަމަ، މި ސިޔާސީ ފުރުސަތު ތަކަކީ ވަކި އާއިލާއަކަށް، ވަކި ރަށަކަށް އޮންނަ އެއްޗަކަށް ވެގެނެއް ނުދާނެ. އެމްޑީޕީގެ ހުރިހާ އަންހެން ވެރިންނަށް ވެސް، ފުރިހަމައަށް، ފުޅާކޮށް ލިބިގެންދާނެ ފުރުސަތުތަކެއް." ރޮޒައިނާ ވިދާޅުވިއެވެ.
އޭނާ ވަނީ ބިރު ކަނޑައިލައިފައި، އަންހެނުން ސިޔާސީ ދާއިރާއަށް ނުކުތުމަށް ވެސް ގޮވައިލައްވައިފައެވެ.
