ހައިކޯޓުގެ އުތުރުގޮފީގައި ޝަރީއަތްތައް ފަށައިފި
ހދ. ކުޅުދުއްފުށީގައި ގާއިމްކޮށްފައިވާ ހައިކޯޓުގެ އުތުރުގޮފީގައި ޝަރީއަތްތައް މިއަދު ފަށައިފިއެވެ.
ހައިކޯޓުގެ އުތުރު ގޮތްޕަށް ހުށަހަޅައިފައިވާ މައްސަލަތައް ބެއްލެވުމަށް ކުޅުދުއްފުށްޓަށް ވަޑައިގަތް ވަފުދުގެ ތެރޭގައި ހިމެނިވަޑައިގަންނަވަނީ ފަނޑިޔާރު މުހައްމަދު ނިޔާޒާއި ފަނޑިޔާރު އަބްދުﷲ ހަމީދުގެ އިތުރުން ފަނޑިޔާރު ހަސަން ޝަފީއުއެވެ.
ކުޅުދުއްފުށްޓަށް ވަޑައިގަތް ފަނޑިޔާރުންގެ ބެންޗުން މިއަދު ވަނީ އުތުރު ގޮފީގައި ހުރި މައްސަލަތަކުގެ ޝަރީއަތްތައް ފަައްޓަވައިފައެވެ. އަދި ހައިކޯޓުން ގެންދަނީ އުތުރު ގޮފީގައި ހުރި މައްސަލަތައް ކުރިއަށްދާ ގޮތުގެ ތާވަލް އާންމުކުރަމުންނެވެ.
މީގެ އިތުރުން ހައިކޯޓުގެ ފަނޑިޔާރުން ވަނީ އައްޑޫ ސިޓީގެ ހުޅުމީދުއަށް ވަޑައިގެން އެ ކޯޓުގެ ދެކުނު ގޮފީގައި ހުރި މައްސަލަތަކުގެ ޝަރީއަތްތައް ވެސް ފައްޓަވައިފައެވެ.
ދެކުނު ގޮފީގެ މައްސަލަތައް ނިންމެވުމަށް ފަހު ފަނޑިޔާރުން އެނބުރި މާލެ ވަޑައިގަތުމަށް ހަމަޖެހިފައި ވަނީ އަންނަ ހޮނިހިރު ދުވަހުއެވެ.
ދެކުނު ގޮފީގެ މައްސަލަތަކުގެ ޝަރީއަތްތަކަށް އައްޑޫއަށް ވަޑައިގެންނެވި ފަނޑިޔާރުންގެ ތެރޭގައި ހިމެނިވަޑައިގަންނަވަނީ ފަނޑިޔާރު ޝުއައިބު ހުސައިން ޒަކަރިއްޔާއާއި ފަނޑިޔާރު ހުސައިން މަޒީދު އަދި ފަނޑިޔާރު މުހައްމަދު ފައިސަލްއެވެ.
Ads by STO
