ރައީސްގެ ހާއްސަ މަންދޫބު އައްބާސް ފާއިޒް ރައީސް ނަޝީދާ ބައްދަލު ކުރައްވައިފި
ރައީސް އިބްރާހިމް މުހައްމަދު ޞާލިޙްގެ ހާއްސަ މަންދޫބެއްގެ ގޮތުގައި ރާއްޖެ ވަޑައިގެންނެވި އައްބާސް ފާއިޒް، ރައްޔިތުންގެ މަޖިލީހުގެ ރައީސް މުހައްމަދު ނަޝީދާ މިއަދު ބައްދަލު ކުރައްވައިފިއެވެ.
އައްބާސް ފާއިޒް ރާއްޖެ ވަޑައިގެންނެވީ، މިދިޔަ އަހަރުގެ މެއި މަހުގެ 6ވަނަ ދުވަހު ރައީސް ނަޝީދު އަވަހާރަ ކޮށްލުމަށް އަމާޒުކޮށް، އެމަނިކުފާނަށް ދިން ހަމަލާ ތަހުގީގު ކުރުމަށާއި މި ހާދިސާއާ ގުޅޭގޮތުން ބާއްވައި އެންމެހައި ކޯޓު މަރުހަލާތަކުގައި ވެސް ބައިވެރިވެވަޑައިގަންނަވާ ގޮތަށެވެ.
ރައީސް ނަޝީދު އަވަހާރަ ކޮށްލުމަށް އަމާޒުކޮށް ދިން އެ ނިރުބަވެރި ހަމަލާ ތަހުގީގު ކުރައްވަން ވަޑައިގެންނެވި އައްބާސް ފާއިޒާ ރައްޔިތުންގެ މަޖީހުގެ ރައީސް މިއަދު ބައްދަލު ކުރެއްވިކަން ހާމަ ކުރައްވައިފައި ވަނީ މަޖިލިސް އިދާރާއިންނެވެ. ނަމަވެސް މި ބައްދަލު ކުރެއްވުމާ ގުޅޭ ގޮތުން އިތުރު މައުލޫމާތެއް ދެއްވައިފައެއް ނުވެއެވެ.
ދާދި ފަހުން އައްބާސް ފާއިޒް ވަނީ، ރައީސް ނަޝީދަށް ދިން ހަމަލާގެ މައްސަލައިގެ ކަންކަން ކުރިއަށްގެންދިޔުން ލަސްކަން ފާހަގަ ކުރައްވައި، އެކަމާ ކަންބޮޑުވުން ފާޅު ކުރައްވައިފައެވެ.
Ads by STO
