6 މެއިގެ ޝަރީއަތް ލަސްވާތީ އައްބާސް ކަންބޮޑުވެއްޖެ

މިދިޔަ އަހަރުގެ މެއި މަހުގެ 6ވަނަ ދުވަހުގެ ރޭ، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ނިރުބަވެރި ހަމަލާގެ ތުހުމަތުގައި ދައުވާ އުފުލައިފައިވާ މީހުންގެ ޝަރީއަތް ލަސްކަމަށް، ރައީސް އިބްރާހިމް މުހައްމަދު ޞާލިޙް އައްޔަންކުރެއްވި މަންދޫބު އައްބާސް ފާއިޒް ވިދާޅުވެއްޖެއެވެ.

Ads by STELCO

މިކަމާ މެދު ކަންބޮޑުވުން ފާޅުކޮށް އައްބާސް މިއަދު ކުރެއްވި ޓްވީޓެއްގައި ވިދާޅުވީ ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ބައެއްގެ މައްޗަށް ދައުވާ އުފުލި ފަހުން މަސްތަކެއް ފާއިތުވެއްޖެ ކަމަށާއި ނަމަވެސް ޝަރީއަތް ކުރިއަށް ގެންދެވިފައި ވަނީ އެންމެ މީހެއްގެ ކަމަށެވެ. އަދި މި މައްސަލައިގެ ވަށައިގެންވާ އެންމެންގެ ޝަރީއަތް ލަސްވެގެން ދިއުމަކީ ކަންބޮޑުވާ ކަމެއް ކަމުގައި ވެސް އައްބާސް ވިދާޅުވިއެވެ.

ރައީސް ނަޝީދަށް ދިން ހަމަލާއާ ގުޅިގެން ކުރިޔަށްދާ ތަހުގީގާއި ކޯޓު މަރުހަލާތައް ގާތުން ބެއްލެވުމަށް ޓަކައި ހާއްސަ މަންދޫބެއްގެ ގޮތުގައި އައްބާސް ހަމަޖެއްސީ މިދިޔަ އަހަރުގެ އޮކްޓޯބަރުގައެވެ.

އިނގިރޭސިވިލާތަށް ނިސްބަތްވެވަޑައިގަންނަވާ އައްބާސް، މެއި ހައެއްގެ ހަމަލާޔާ ގުޅޭ އެންމެހައި ތަހުގީގެއްގައި ޕްރޮސެކިއުޓާ ޖެނެރަލް ކަނޑައަޅުއްވާ ހުދޫދުގެ ތެރެއިން ބައިވެރިވެވަޑައިގަންނަވާނެއެވެ. އަދި، އިންސާފު ގާއިމުކުރެވެންދެން ބޭނުންވާ ހާލަތްތަކުގައި ކަމާގުޅޭ ލަފަޔާއި އިރުޝާދު ދެއްވައި، ތައްޔާރުކުރައްވަން ޖެހިވަޑައިގަންނަވާ އެންމެހާ ރިޕޯޓެއް ވެސް އައްބާސް ފާއިޒް ތައްޔާރުކުރައްވާނެއެވެ.

އައްބާސް މަސައްކަތް ކުރައްވަނީ ރައީސް އޮފީހުގައެވެ. އެ އޮފީހުން ބުނެފައި ވަނީ، މި ހަމަލާއާ ގުޅޭ އެންމެހާ ތަހުގީގެއް ނިމި ތުހުމަތު ކުރެވޭ މީހުންނާ މެދު ޝަރީއަތް ކުރެވި ނިހާއީ ހުކުމަކާ ހަމައަށް ވާސިލް ވަންދެން އައްބާސް ފާއިޒް މަސައްކަތުގައި ދެމިހުންނަވާނެ ކަމަށެވެ.