ސައީދުގެ ރައްދު އިމްރާނަށް: އިންޑިއާ އައުޓް ހަރަކާތް ބޭއްވޭނެ
މިމަހުގެ 25 ވަނަ ދުވަހު، ވެރިރަށް މާލޭގައި ބޭއްވުމަށް ނިންމައިފައިވާ "އިންޑިއާ އައުޓް" ހަރަކާތް ކުރިއަށް ނުގެންދެވޭނެ ކަމަށް ވިދާޅުވެ ހޯމް މިނިސްޓަރު އިމްރާން އަބްދުﷲ ދެއްވި އިންޒާރަށް ޕީއެންސީގެ ނައިބު ރައީސް މުހައްމަދު ސައީދު ރައްދު ދެއްވައިފިއެވެ.
ސައީދު ކުރެއްވި ޓްވީޓެއްގައި ވިދާޅުވީ، "ނޭވާހޮޅިޔަށް" މި ނަމުގައި ބޭއްވުމަށް ހަމަޖައްސައިފައިވާ ހަރަކާތް ބޭއްވޭނެ ކަމަށާއި، އެ ހަރަކާތް ނުބޭއްވޭނެކަމަށް އިދިިކޮޅު ފަރާތްތަކަށް އެންގެވި ކަމަށް ވިދާޅުވެ، މަޖިލީހުގެ މިއަދުގެ ޖަލްސާގައި ހެއްދެވީ އިތުރުފުޅެއްކަމަށް އިމްރާން އަދި އެއްބަސްވެވަޑައިގަންނަވާނެ ކަމަށެވެ.
"ޔޫޓީއެފް ފަދަ ނުރައްކާތެރި އެއްބަސްވުންތައް ފެނިފައި ނުވާ ކަމަށް މީގެ ކުރިން ހޯމް މިނިސްޓަރު ވަނީ މަޖިލިސްގައި ވިދާޅުވެފައި." ސައީދު ވިދާޅުވިއެވެ.
އިންޑިއާ އައުޓް ހިންގަން އުޅޭ ކަމުގެ މައުލޫމާތު ލިބިގެން، ހަރަކާތް ހިންގާ ފަރާތްތަކާ ބައްދަލުކޮށް ގާނޫނާ ހިލާފު އެއްވެސް ހަރަކާތެއް ހިންގުމަށް ފުލުހުން ޖާގަ ނުދޭނެ ކަމަށް ވިދާޅުވެފައިވާނެ ކަމަށް މިނިސްޓަރު އިމްރާން މިއަދު ވަނީ ވިދާޅުވެފައެވެ.
އިދިކޮޅު ކޯލިޝަނުގެ ތަރުޖަމާނު ހީނާ ވަލީދު ވެސް، މިއަދު ވިދާޅުވީ މިނިސްޓަރު ހެއްދެވީ ކަނޑައެޅިގެން އިތުރުފުޅެއް ކަމަށެވެ.
