ހުޅުމާލޭގައި މިރޭ ހަވާ އަރުވަނީ
ފުލުހުންގެ އަހަރީ ދުވަސް ފާހަގަ ކުރުމުގެ ގޮތުން މިރޭ ހަވާ އަރުވާނެކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ ފުލުހުންގެ 89ވަނަ އަހަރީ ދުވަހުގެ މުނާސަބަތުގައި މިރޭ 23:00ގައި، ހުޅުމާލެ ސެންޓްރަލް ޕާކްގައި ހަވާއެރުވުން ބޭއްވުމަށް ހަމަޖެހިފައިވާ ކަމަށެވެ.
ފުލުހުންގެ އަހަރީ ދުވަސް ފާހަގަ ކުރުމަށް ރޭ ޖުމްހޫރީ މައިދާނުގައި ވަނީ ރަސްމީ ޖަލްސާއެއް ވެސް ބާއްވައިފައެވެ.
އެ ރަސްމިއްޔާތުގައި، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު، ދިވެހިރާއްޖޭގެ އުއްތަމަ ފަނޑިޔާރު މުޢުތަޞިމް އަދުނާން، މިނިސްޓަރ އޮފް ހޯމްއެފެއާޒް އިމްރާން ޢަބްދުﷲ، ކޮމިޝަނަރ އޮފް ޕޮލިސް މުޙައްމަދު ޙަމީދު، ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފް، ޑެޕިއުޓީ ކޮމިޝަނަރ އޮފް ޕޮލިސް ޢަލީ ރަޝީދު، އަދި ދައުލަތުގެ ވަޒީރުންނާއި ރައްޔިތުންގެ މަޖިލިސްގެ އިއްޒަތްތެރި މެމްބަރުންނާއި، ދައުވަތު އެރުވިގެން ވަޑައިގެންނެވި ބޭފުޅުން ބައިވެރިވެވަޑައިގެންނެވިއެވެ. އަދި ފުލުހުންގެ ކޮމިޝަންޑު އޮފިސަރުންނާއި، އެގްޒެކެޓިވް އޮފިސަރުންނާއި، އެހެނިހެން ފުލުހުންނާއި ފުލުހުންގެ ސިވިލް މުވައްޒަފުން ބައިވެރިވިއެވެ.
އެ ރަސްމިއްޔާތުގައި ރައީސުލްޖުމްހޫރިއްޔާގެ ކުލައާއި މެޑަލް ލިބިލެއްވި ފުލުހުންނަށް ކުލައާއި މެޑަލް ދީފައިވެއެވެ.
