މިރޭގެ އިޙްޔާ ފޯރަމްގައި ތަޤުރީރު ކުރައްވާނީ ފައްޔާޒާއި ޑރ.ޢަބްދުއްސައްތާރު
ރޯދަ މަހުގެ ރޭތައް އިހުޔާކުރަން އިސްލާމިކް މިނިސްޓްރީން ބާއްވަމުން އަންނަ "އިހުޔާ ފޯރަމް"ގެ ތެރެއިން މިރޭ ބާއްވާ ފޯރަމްގައި ޝައިހް ފައްޔާޒް އަލި މަނިކާއި ޑރ. އަބްދުއްސައްތާރު އަބްދުއްރަހުމާން ތަގުރީރުކުރައްވާ ގޮތަށް ހަމަޖެހިއްޖެއެވެ.
މިރޭ އޮންނަ ފޯރަމްގައި ޝައިހް ފައްޔާޒް އަލި މަނިކާއި ޑރ. އަބްދުއްސައްތާރު އަބްދުއްރަހުމާން ތަޤުރީރް ކުރައްވާނީ "އިންސާނީ ހާލަތު ޤުރުއާނުގެ އަލީގައި" މި މައުޟޫޢުއެވެ. މިރޭގެ ދަރުސް އޮންނާނީ އިސްލާމީ މަރުކަޒުގައެވެ.
ރަމަޟާންމަހުގެ ރޭތައް އިޙްޔާކުރުމަށް ކުރިއަށްގެންދާ އިޙްޔާ ފޯރަމްތައް މާލޭގެ އިތުރުން އަތޮޅުތަކުގެ ބައެއް ރަށްރަށުގައި ވެސް ކުރިއަށްގެންދެއެވެ. އެގޮތުން ހދ. ކުޅުދުއްފުއްޓާއި އައްޑޫ ހިތަދު އާއި ރ. ދުވާފަރާއި ފުވައްމުލަކުގެ އިތުރުން ގދ. ތިނަދޫގައި ވެސް ފޯރަމް ގެނެސް ދީފައިވެއެވެ.
އަތޮޅުތަކުގައި ބާއްވާ މި ސިލްސިލާގެ ދަށުން 29 އޭޕްރީލްގައި ރ. އުނގޫފާރުގައި މި ފޯރަމް ކުރިއަށް ގެންދާނެއެވެ.
އިސްލާމިކް މިނިސްޓްރީން ވިދާޅުވީ، އާދިއްތަ އަދި ބުރާސްފަތި ދުވަހު އިޙްޔާ ފޯރަމްތައް ކުރިއަށްދާނީ މާލެ ސިޓީގެ އިސްލާމީ މަރުކަޒުގައި ކަމަށެވެ. އަދި ހުކުރު ދުވަހުގެ ރޭގެ އިޙްޔާ ފޯރަމްތައް ކުރިއަށް ގެންދާނީ ރަށްރަށުގައި ކަމަށެވެ.
