5000އަށް ވުރެ ގިނަ ދަރިވަރުންނާ އެކު އޯލެވެލް އިމްތިހާން ފަށައިފި
މިއަހަރުގެ އޯލެވެލް އިމްތިހާނު 5000އަށް ވުރެ ގިނަ ދަރިވަރުންނާ އެކު ފަށައިފިއެވެ.
އެޑިއުކޭޝަން މިނިސްޓްރީން ވިދާޅުވީ މިއަހަރުގެ އިމްތިޙާނުގައި ޖުމްލަ 5939 ދަރިވަރުން އިމްތިޙާނު ހެދުމަށް ހަމަޖެހިފައިވާކަމަށެވެ.
މިއަހަރުގެ އިމްތިހާނުގައި ރާއްޖޭގެ 239 ސެންޓަރަކާއި ޑިޕާޓްމަންޓް އޮފް ޕަބްލިކް އެގްޒޭމިނޭޝަންސްގެ ބެލުމުގެ ދަށުން ސްރީލަންކާގައި ހުންނަ މޯލްޑިވްސް ކަލްޗަރަލް ސެންޓަރުގައާއި އަދި މެލޭޝިޔާގައި ހުންނަ މޯލްޑިވްސް ސެންޓަރުގައި އޯލެވެލް އިމްތިޙާނު ކުރިއަށްދާނެކަމަށް އެޑިއުކޭޝަނުން ވިދާޅުވެއެވެ.
މި އިމްތިހާން ކުރިއަށް ދާނީ މިއަދުން ފެށިގެން އަންނަ ޖޫން މަހުގެ 10ވަނަ ދުވަހުގެ ނިޔަލަށެވެ. ނަމަވެސް އެ އިމްތިހާނުގައި އާޓް އެންޑް ޑިޒައިން ޕޭޕަރު ހަދާ ދަރިވަރުންގެ އިމްތިހާނު މިދިޔަ އޭޕްރިލް މަހުގެ 13 އަދި 14ގައި ވަނީ ބާއްވައިފައެވެ. މި ދެ ދުވަސްމަތިން ރާއްޖޭގެ އެކި ސެންޓަރުތަކުން 181 ދަރިވަރަކު ވަނީ އާޓް އެންޑް ޑިޒައިން އިމްތިޙާނު ހަދައިފައެވެ.
އެޑިއުކޭޝަން މިނިސްޓްރީން ވިދާޅުވީ އިމްތިޙާނު ދުވަސްވަރު ކޮވިޑަށް ފައްސިވާ ދަރިވަރުންނަށް ޚާއްސަ އިންތިޒާމްތަކެއްގެ ތެރެއިން އިމްތިޙާނުގައި ބައިވެރިވުމުގެ ފުރުސަތު އޮންނާނެ ކަމަށެވެ.
