އީދު ދުވަހު ހިންގި މާރާމާރީތަކާ ގުޅިގެން ހައްޔަރުކުރި ދެމީހެއްގެ ބަންދަށް 5 ދުވަސް
މިދިޔަ ފިތުރު އީދު ދުވަހުން ފެށިގެން މާލޭގައި ހިންގި މާރާމާރީތަކުގެ މައްސަލައާ ގުޅިގެން ހައްޔަރު ކުރި އަހުމަދު ޝިމްހާޒުއާއި ލޫތު އަހުމަދު އާސިފް ފަސްދުވަހުގެ މުއްދަތަށް ބަންދު ކުރުމަށް ކުރިމިނަލް ކޯޓުން މިއަދު އަމުރުކޮށްފިއެވެ.
އެ ދެމީހުން ބަންދު ކުރީ ޖަމާއަތް ހަދައިގެން ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމާއި މުޖުތަމައުގެ އަމަން ނަގައިލުމުގެ މައްސަލައިގައެވެ.
މިދިޔަ ހޯމަ ދުވަހު ގްރޫޕް ހަދައި ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައާ ގުޅިގެން ހަތް މީހަކު ހޯދަން ފުލުހުން ވަނީ ފޮޓޯއާއި ވަނަވަރު ހާމަކޮށްފައެވެ.
ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައާ ގުޅިގެން ފުލުހުން ހޯދަން އިއުލާންކޮށްފައި ވަނީ ކ. މާލެ/ ދަފްތަރު ނަންބަރު ރސ2260، މަޢުޞޫމް މުޙައްމަދުދީދީ (27އ)، ތ. ތިމަރަފުށި/ ސީނުގެ، އަޙްމަދު ޝިމްޙާޒު (22އ)، ކ. މާލެ/ މ. ލޮނުމިދިލިގެ، ލޫޠު އަޙްމަދު އާސިފް (18އ)، ގއ. މާމެންދޫ/ ގްލޭނޫރަންމާގެ، އަޙްމަދު ރަބީޢު (24އ)، ގއ. ގެމަނަފުށި/ ކެނެރީގެ، އަޙްމަދު ނާޒިހު (27އ)، ސ. ހުޅުދޫ/ ނާދީ، މުނާދު ޖަޢުފަރު (20އ) އަދި ސ. މަރަދޫ/ ކޮރަލް، އަޙްމަދު ސާތިޢު (21އ)އެވެ.
Ads by STO
