ބަދަލުގެ ފައިސާއާ ގުޅިގެން ފައްޔާޒް ގޮވައިލެއްވީ އިންކުއަރީއަކަށް!
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)، އިކޮނޮމިކް މިނިސްޓަރު ފައްޔާޒް އިސްމާއީލަށް ކުރައްވާ ތުހުމަތުތައް ތަޙްޤީޤް ކުރައްވަން އެދިވަޑައިގެންފިއެވެ.
ރާއްޖެޓީވީން ކުރިއަށްގެންދިޔަ "ޗެއާޕާސަން ބަހުސް 2022"ގައި ވާހަކަފުޅު ދައްކަވަމުން ޗެއަރޕާސަންގެ މަގާމަށް ވާދަކުރައްވާ އިންތި ވަނީ، އޭނާގެ ވާދަވެރި ކެނޑިޑޭޓަށް އިޝާރާތް ކުރައްވާ އާއިލާގެ ކުންފުންޏަށް ބޮޑެތި އަދަދުތަކުން ބަދަލު ދެއްވާ ކަމަށާއި ޚިޔާނާތުގެ މައްސަލައެއްގައި ފައްޔާޒްއާ ގުޅުން އޮންނަ ކުންފުންޏެއްގެ މައްސަލަ ނުބެލި އޮތް ކަމަށް ވިދާޅުވެފައެވެ.
އިންތި ވިދާޅުވީ، އެ މަނިކުފާނު މި އިންތިޚާބުގައި ވާދަ ކުރައްވަނީ ހަމަހަމަކަމާއި އިންސާފާއި ނަޒާހަތްތެރިކަމާއި ތަފާތު ކުރުން ނައްތައިލާން ކަމަށާއި ތިލަފަތުގެ ރަމްޒަކީ އެއީ ކަމަށެވެ.
"ތިލަފަތުގެ ރަމްޒަކީ އިންޖީނު ގޭގައި ހުރި ކުއްޖާއަށް މި އިންތިޚާބާ ގުޅިގެން ބިރު ދެއްކުމެއް ނޫން. ތިލަފަތުގެ ރަމްޒަކީ ފެނަކައިގައި ހުންނަ ކުއްޖާ، އަޅުގަނޑުމެންނަށް ތާއީދު ކުރާ ޕޯސްޓެއް ލިޔުނީމާ އެމީހުންނަށް އިންޒާރު ދީ މަނާ ކުރުމެއް ނޫން. ތިލަފަތުގެ ރަމްޒަކީ ވަޒީރަށް ވޯޓް ނުދެއްވައިފި ނަމަ ރަށް ފަޅު ކުރާނެ ވާހަކަ ރަށްރަށަށް ވަޑައިގެން ދެއްކުމެއް ނޫން. އެއީ މި ޕާޓީއާ ވަރަށް ނުގުޅޭ ގޮތްތައް އެއީ." ފައްޔާޒަށް ފާޑު ވިދާޅުވަމުން އިންތި ވިދާޅުވިއެވެ.
އިންތިގެ ވާހަކަފުޅަށް ރައްދު ދެއްވަމުން ފައްޔާޒް ވިދާޅުވީ ތިލަފަތުގެ ރަމްޒަކީ ހަމަހަމަކަން ކަމަށާއި ފިތުނަވެރި ވާހަކަ ދެއްކުން ނޫން ކަމަށެވެ. އަދި މީހަކާ ދިމާލަށް ތުހުމަތެއް ކުރާނަމަ އެކަން ސާފުކޮށްދެން ވާނެ ކަމަށް ވިދާޅުވިއެވެ.
"ވެންޓިލޭޓަރުގެ ވާހަކަ، ވައްކަމުގެ ވާހަކަ ދެކެވެން ވާނެ ތާއަބަދު ވައްކަމޭ ވައްކަމޭ ނޫން ތިލަފަތުގެ ރަމްޒުން ކިޔަން ޖެހޭނީ. އެއީ ކޮންކަމެއްކަން ސާބިތުކޮށްދެއްވަން ވާނެ. މަޖިލީހުގެ ކޮމިޓީތަކަށް ހުށަހެޅެންވާނެ. ހުށަހެޅިގެން ދިވެހި ރައްޔިތުންނަށް ދައްކައިދެން އެބަޖެހޭ، އަޅުގަނޑުގެ އާއިލާއަށް ބަދަލެއް ދީފައި އޮތްނަމަ ކިހިނެތް ވެފައި އޮތް ކަމެއްތޯ، އެކަން ބަލަން ޖެހޭ" ފައްޔާޒް ވިދާޅުވީ، ގޯސްކޮށް ކަމެއް އޮތްނަމަ އެކަން ބަލާ ފިޔަވަޅު އަޅަން ގޮވައިލާ ކަމަށެވެ.
"އަޅުގަނޑު، އަޅުގަނޑުގެ ވާދަވެރި ކެނޑިޑޭޓަށް ދަންނަވަން، އާދޭހާ އެކު ދަންނަވަން، ކޮމިޓީއެއް ހައްދަވައިގެން އެކަންކަން ބައްލަވާށޭ. ލައްކަ ޒަމާންވެއްޖެ އަޅުގަނޑުގެ ބޮލުގައި ތި ބޭފުޅުން ބޮޑެތި އިލްޒާމްތައް އަޅުވަމުންދާތާ، މިހާރު ތިބޭފުޅުންގެ މައްޗަށް މަޖުބޫރޭ މިކަން ބަލާ، ތަޙްޤީޤްކޮށް އަޅުގަނޑު ތިބޭފުޅުންނަށް ގޮވައިލަން އާއްމު އެންކުއަރީއެއްގެ ގޮތުގައި މިކަން ބަލާ، މަޖިލިސް ތެރެއިން އަޅުގަނޑަށް ޖަވާބުދާރީވާނެ ފުރުސަތު ދީގެން ނޫސްވެރިންނާއި އާއްމުންނަށް، އޯޕަންކޮށް މިކަން ކުރެވޭނެ ގޮތް ކުރަން ވެއްޖެ"
