މިފަހަރު 'އިންޑިޔާ އައުޓު' ޖެހީ އިންޑިޔާ ސަފީރު ދިރިއުޅުއްވާ ގެކޮޅު ކުރިމަތީގައި!
އިންޑިޔާއިން ދިވެހިރާއްޖެއަށް ކަނޑައަޅުއްވައިފައި ހުންނަވާ ސަފީރު، މުނޫ މަހާވަރު ދިރިއުޅުއްވާ އިމާރާތް ކުރިމަތީގައި 'އިންޑިޔާ އައުޓު' ސްޕްރޭކޮށްފިއެވެ.
އިންޑިޔާ ސަފީރު ދިރިއުޅުއްވަމުން ގެންދަވަނީ ހުޅުމާލޭގައި ހުންނަ އަމީން އެވެނިއު އިމާރާތުގައެވެ.
ދިވެހިރާއްޖޭގައި އިންޑިއާ ސިފައިން ޤާއިމުވެ ތިބިކަމަށް ބުނެ އިންޑިޔާ އަސްކަރިއްޔާ ރާއްޖެއިން ބޭލުމަށް އިދިކޮޅު ފަރާތްތަކުން ފަށައިފައިވާ 'އިންޑިޔާ އައުޓު' ކެމްޕެއިންގެ ތެރެއިން މާލޭގެ އެކި ތަންތާ މި މޭރުމުން ސްޕްރޭ ކުރުމާއި ބެނާތައް އަންނަނީ ނަގަމުންނެވެ.
އެހެން ނަމަވެސް މި ހަރަކާތަކީ ޤައުމީ ސަލާމަތަށް ނުރައްކަލެއްކަމަށް ނިންމަވައި ރައީސް އިބްރާހިމް މުޙައްމަދު ޞާލިޙް ވަނީ ހާއްސަ ޤަރާރެއް ނެރެ މިކަން ހުއްޓުވުމަށް ކަމާ ބެހޭ ފަރާތްތަކަށް އަންގައިފައެވެ. އެގޮތުން އިންޑިޔާ އައުޓުގެ ނަމުގައި ބާއްވާ އެއްވުންތައް ވެސް ފުލުހުން އަންނަނީ ބާރުގެ ބޭނުންކޮށްގެން ހުއްޓުވަމުންނެވެ.
މީގެ އިތުރުން ކޯޓު އަމުރު ހޯދައި އިންޑިޔާ އައުޓު ބެނާތައް ވެސް ފުލުހުން ނަގަމުން ގެންދާކަން ފާހަގަކޮށްލެވެއެވެ. އިދިކޮޅު ލީޑަރު ރައީސް ޔާމީންގެ ގެކޮޅުގައި ދަމައިފައިވާ ބެނާ ނަގަން ފުލުހުން ވަތް މައްސަލަ މިހާރު ވަނީ ކޯޓަށް ހުށަހަޅައިފައެވެ.
