ރަޝިއާގެ ދިފާއުގައި ޗައިނާއިން ނިކުންނާނެ: ޗައިނާގެ ރައީސް
ސިޔާދަތާއި ސަލާމަތީ ކަންކަމުގައި މޮސްކޯއަށް ތާއީދު ކުރައްވާކަން ޗައިނާގެ ލީޑަރު ޝީ ޖިންޕިން ހާމަކުރައްވައިފިއެވެ.
ޝީގެ 69ވަނަ އުފަން ދުވަހު، އެ މަނިކުފާނު ވަނީ ރަޝިއާގެ ރައީސް ޕުޓިންއަށް ގުޅުއްވައި ޗައިނާއިން ރަޝިއާއާ އެކު އޮންނާނެ ކަމުގެ ޔަޤީންކަން ދެއްވައިފައެވެ. މިއީ ރަޝިއާއިން ޔޫކްރެއިންއަށް އަރައިގަތްފަހުން ޗައިނާގެ ރައީސް، ރަޝިއާގެ ރައީސަށް ގުޅުއްވި ދެވަނަ ފަހަރެވެ.
ޗައިނާއިން ވަނީ ރަޝިއާއިން ޔޫކްރެއިންއަށް އަރައިގަތުމަކީ އިސްތިއުމާރެއްގެ ގޮތުގައި ބުނުމަށް ދެކޮޅު ހަދައިފައެވެ. ނަމަވެސް މައްސަލަ ސުލްޙަވެރި ގޮތުގައި ހައްލު ކުރުމަށް ވަނީ ގޮވައިލައިފައެވެ.
ރަޝިއާއިން ޔޫކްރެއިންއަށް އެރުމުން ހުޅަނގުން ވަނީ ރަޝިއާ ދެކޮޅަށް ދަތިކުރުމުގެ ފިޔަވަޅުތައް އަޅައިފައެވެ. އެއާ އެކު ރަޝިއާއާއި ޗައިނާއިން ކުރަމުން އަންނަ ވިޔަފާރިތައް ވަނީ އިންތިހާއަށް އިތުރުވެފައެވެ.
