ޑްރަގް އެތެރެކުރި މީހުންގެ ބަނޑުގައި ހުރި 240 ބުލެޓު ނެގުމުން ހޮސްޕިޓަލުން ދޫކޮށްލައިފި
މަސްތުވާތަކެތި ދިރުވައިލައިގެން ރާއްޖެ އައި ދެ ބިދޭސީންގެ ބަނޑުގައި ހުރި ހުރިހައި ބުލެޓެއް ނެގުމުން އެ ދެ މީހުން ހޮސްޕިޓަލުން ދޫކޮށްލައިފިއެވެ.
ދިރުވާލައިގެން ރާއްޖެއަށް މަސްތުވާތަކެތި އެތެރެކުރަން މަސައްކަތް ކުރީ އަޔަރލޭންޑްގެ ދެ ފިރިހެނުންކަމަށްވާ ކެލްވިން މައިކަލް މެރޫ (41އ)އާއި އަލަން ވަލްޓަރ ކްރޮވް (41އ)އެވެ.
މައުލޫމާތު ލިބޭ ގޮތުގައި އެއިން ކޮންމެ މީހެއްގެ ބަނޑުގައި 120 ބުލެޓުގެ މަސްތުވާތަކެތި ހުރިއެވެ. އެ މީހުންގެ ބަނޑުގައި ހުރި މަސްތުވާތަކެތި ބޭރުކުރެވެންދެން ކްރިމިނަލް ކޯޓުން މިދިޔަމަހުގެ 30ވަނަ ދުވަހުގައި އެ މީހުންގެ ޣައިރު ހާޒިރުގައި ބަންދަށް ދިނީ ފަސް ދުވަހެވެ. އެއީ މަސްތުވާތަކެތި ބޭރުކޮށް ނިމި ހޮސްޕިޓަލުން ދޫކޮށްލުމުން އެ ދެ މީހުން ކޯޓަށް ހާޒިރުކުރުމަށް ފުލުހުންނަށް އަމުރުކުރުމަށް ފަހުއެވެ.
އެ މީހުންގެ ބަނޑުގައި ހުރި ހުރިހާ ބުލެޓުތައް މިހާރު ވަނީ ބޭރުކޮށްފައެވެ. ''ދެން''އަށް އެކަން ކަށަވަރުކޮށްދެމުން އައިޖީއެމްއެޗުން މިއަދު ބުނީ އެ ދެ މީހުންގެ ބަނޑުގައި ހުރި ހުރިހައި ބުލެޓެއް ބޭރުކުރެވިފައިވާތީ ހޮސްޕިޓަލުން އެ މީހުން ދޫކޮށްލާފައިވާ ކަމަށެވެ. ނަމަވެސް އިތުރު ތަފްސީލެއް ހިއްސާއެއް ނުކުރެއެވެ.
Ads by STO
