އޯގަސްޓްމަހުގެ ނިޔަލަށް 1 މިލިޔަން ފުަ
މިއަހަރުގެ މިހާތަނަށް ރާއްޖެއަށް އެއް މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.
ޓުއަރިޒަމް މިނިސްޓްރީން އާންމުކޮށްފައިވާ ތަފާސްހިސާބުތަކަށް ބަލައިލާއިރު، އޮގަސްޓްމަހު އެކަނިވެސް ރާއްޖެއަށް ވަނީ 131،863 ފަތުރުވެރިން ރާއްޖެ އައިސްފައެވެ. އޮގަސްޓްމަހުގެ ނިޔަލަށް ރާއްޖެ އައި ޖުމްލަ ފަތުރުވެރިންގެ އަދަދު 1،078،635 އަށް އަރައެވެ. މިއީ މިދިޔަ އަހަރުގެ މިމުއްދަތާއި އަޅާ ބަލާއިރު 42.7 އިންސައްތަ އިތުރު އަދަދެކެވެ.
މިއަހަރުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މާޗް މަހުގައެވެ. އެމަހު ރާއްޖެއަށް 150،748 ފަތުރުވެރިން ޒިޔާރަތްކޮށްފައެވެ. ދެން އެންމެ ގިނަ ފަތުރުވެރިން ޒިޔާރަތްކުރީ ފެބްރުއަރީ މަހުގައެވެ. އެމަހު 149،008 ފަތުރުވެރިން ޒިޔާރަތްކޮށްފައިވާއިރު، އޭޕްރީލް މަހު 145،280 ފަތުރުވެރިން ވަނީ ޒިޔާރަތްކޮށްފައެވެ.
މީގެއިތުރުން ޖުލައި މަހު 133،561 ފަތުރުވެރިން، ޖެނުއަރީ މަހު 131،764 ފަތުރުވެރިން، މެއި މަހު 125،522 ފަތުރުވެރިން އަދި ޖޫން މަހު 110،889 ފަތުރުވެރިން ޒިޔާރަތްކޮށްފައިވެއެވެ.
މިއަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވާ ގައުމެއްގެ ގޮތުގައި ފާހަގަކުރެވެނީ އިންޑިޔާއެވެ. އިންޑިޔާއިން މިއަހަރުގެ މިހާތަނަށް 153،204 ފަތުރުވެރިން ވަނީ ޒިޔާރަތްކޮށްފައެވެ. ދެން އެންމެ ގިނައިން ފަތުރުވެރިން ޒިޔާރަތްކުރި ގައުމުތަކުގެ ގޮތުގައި ފާހަގަކުރެވެނީ ރަޝިޔާ، ޔޫކޭ، ޖަރމަނީ އަދި އިޓަލީއެވެ
