ފަތުރުވެރިކަމުގެ ދާއިރާއިން އެތައް ހާސް ވަޒީފާއެއް އުފެއްދިއްޖެ: ރައީސް
މި ވެރިކަން އައިފަހުން ފަތުރުވެރިކަމުގެ ދާއިރާއިން
އެތައް ހާސް ވަޒީފާއެއް އަލަށް އުފެއްދިއްޖެ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައި ދެއްކެވި ވާހަކަފުޅުގައި ރައީސް ވިދާޅުވީ އެ މަނިކުފާނު ރައީސްކަމުގެ ހުވާ ކުރެއްވި ދުވަހުން ފެށިގެން މިދިޔަ މަހުގެ ނިޔަލަށް ރާއްޖޭގައި އަލަށް 33 ރިޒޯޓާއި, 471 ގެސްޓްހައުސް ހުޅުވައިފި ކަމަށާއި, އެއީ 8385 ކޮޓަރި ނުވަތަ 16783 އެނދު ކަމަށެވެ.
''ސީދާ އެ ތަންތަނުން ވެސް އެތައް ހާސް ވަޒީފާއެއް އުފެދޭނެކަމާމެދު ޝައްކެއްނެތް. އަދި އެ ތަންތަން ހުޅުވުމާއެކު ފަތުރުވެރިކަމާ ގުޅުންހުރި އެހެން ދާއިރާތަކުން ވެސް އިތުރު އެތައް ހާސް ވަޒީފާއެއް އުފެދިފައިވާނެ.''
ރައީސް ވިދާޅުވީ މިދިޔަ މަހުގެ ނިޔަލަށް ރާއްޖޭގައި 166 ރިޒޯޓާއި، 3 ޔޮޓް މެރީނާއާއި، 13 ޓޫރިސްޓް ހޮޓަލާއި، 721 ގެސްޓްހައުސްއާއި, ހޯމް ސްޓޭ 4 ގެސްޓްހައުސްއާއި، 147 ޓޫރިސްޓް އުޅަނދާއި، 7 ބެއަރ ބޯޓް ރަޖިސްޓްރީކޮށް ހިންގަމުން އެބަ ދާ ކަމަށެވެ. އެނދުގެ ޢަދަދަށް ބަލާއިރު އެއީ 57436 އެނދުކަމަށް ރައީސް ވިދާޅުވިއެވެ.
އަދި މިހާރު ވެސް ރާއްޖޭގެ 20 އަތޮޅުގެ 105 ރަށެއްގައި ގެސްޓްހައުސްތައް އެބަ ހިންގާ ކަމަށާއި, އިތުރު ރަށްރަށުގައި ވެސް އިތުރު ގެސްޓްހައުސްތައް ހުޅުވުމަށް އެ އަންނަނީ ތައްޔާރުވަމުން ކަމަށެވެ.
''އެހެން ނަމަވެސް އެވަރަކުން އަދި ނުފުދޭ. ފަތުރުވެރިކަމުގެ ސާލު މުޅި ރާއްޖެއަށް ފަތުރައިލުމަކީ އަޅުގަނޑުމެންގެ އެއް އަމާޒު.''
އަދި ސަރުކާރުގެ ސިޔާސަތަކީ ޕްރައިވެޓް ސެކްޓަރގެ ބައިވެރިވުމާއެކު ފަތުރުވެރިކަމުގެ އުދަރެސް ފުޅާކޮށް ސިނާޢަތު ސިންދަފާތުކުރުން ކަމަށް ވެސް ރައީސް ވިދާޅުވިއެވެ.
Ads by STO
