ޑްރަގް މައްސަލައެއްގައި ލަންކާ މީހަކު ޢުމުރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފި
ކެނަބިސް ޓްރެފިކް ކުރުމުގެ ދަޢުވާ ސާބިތުވި ސްރީލަންކާގެ ރައްޔިތަކު ޢުމުރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
އެ ދަޢުވާ އުފުލީ ސްރީލަންކާގެ ރައްޔިތެއްކަމަށްވާ ރަނަސިންގް ޓިއްސާ ހެވަގެ ގެ މައްޗަށެވެ. އެއީ މާލޭ ގެއެއްގައި އޭނާ ނިދާ ކޮޓަރިން 300 ގުރާމަށްވުރެ ގިނަ ކެނަބިސް ފެނުނު މައްސަލައިގައެވެ.
އޭނާ ވަނީ ދަޢުވާއަށް އިންކާރުކޮށްފައެވެ. އެކަމަކު ދައުލަތުން ހުށަހެޅި ހެއްކާއި ޤަރީނާއަށް ރިޢާޔަތްކޮށް ކްރިމިނަލް ކޯޓުން ނިންމީ އޭނާގެ މައްޗަށް ކުށް ސާބިތުވާ ކަމަށެވެ. ކްރިމިނަލް ކޯޓުން ޙުކުމްކުރީ އޭނާ ޢުމުރަށް ޖަލަށްލުމަށާއި, 100,000 ރުފިޔާއިން ޖޫރިމަނާ ކުރުމަށެވެ.
މީގެ އިތުރުން އޭނާގެ ކުޑަކަމުދާ ތަކެތި ކެނަބިސްއަށް ޕޮޒިޓިވްވެފައިވާތީ އުފުލި ކެނަބިސް ބޭނުންކުރުމުގެ ކުށުގެ ދަޢުވާ ސާބިތުވެ, އިއްވީ ތިން އަހަރު ދުވަހުގެ ޖަލު ޙުކުމެކެވެ. ނަމަވެސް އޭނާ ބަންދުގައި ހުރި މުއްދަތު އުނިކުރުމުން ދެ ދަޢުވާއަށް އައި ޙުކުމުން މިހާރު ތަންފީޒު ކުރަންޖެހޭނީ ޖުމްލަ 25 އަހަރާއި ހަތަރު މަހާއި ތޭރަ ދުވަހުގެ ޖަލު ޙުކުމެކެވެ.
