އަލިފާނުގެ ހާދިސާގައި މަރުވި މީހުންގެ އަދަދު 10އަށް
ރޭ މާލޭގައި ހިނގި ނުރައްކާތެރި އަލިފާނުގެ ހާދިސާގައި މަރުވި މީހުންގެ އަދަދު 10އަށް އަރާފައިވާ ކަމަށް ފުލުހުން ދެންމެ ވިދާޅުވެއްޖެއެވެ.
ފުލުހުން ވިދާޅުވީ މޯލްޑިވްސް ނެޝަނަލް ޑިފެންސް ފޯސް(އެމްއެންޑީއެފް)އިން ސީނުގައި ހަރަކާތްތެރިވަމުން އަންނަ ކަމަށާއި، އިތުރު މަޢުލޫމާތު ލިބެމުންދާވަރަކުން ހާމަ ކުރައްވާނެ ކަމަށެވެ.
ރޭ އަލިފާން ރޯވެފައިވަނީ މާލޭގެ އިސްކަންދަރު މަގާ ކޯރުކެނޑި މަގު ގުޅޭ ހިސާބުގައި ހުރި މ.ނިރުފެހި ކިޔާ ގެއެއްގައެވެ. އެގޭގައި ގަރާޖަކާ ލޭބަރ ކުއާޓަރެއް ހުރެއެވެ. އެނގިފައިވާ ގޮތުގައި، މި ހާދިސާގައި މަރުވެފައިވަނީ ބިދޭސީންނެވެ.
މި ހާދިސާއާ ގުޅިގެން، ރޭ އައިޖީއެމްއެޗަށް ގެންދެވުނު ދެ މީހުންގެ ތެރެއިންވެސް އެކަކު މަރުވިއެވެ.
އެމްއެންޑީއެފުން ވިދާޅުވީ އިމާރާތުގައި ތާށިވި އިތުރު މީހަކު އަދިވެސް ހޯދަމުން އަންނަ ކަމަށެވެ.
ފުލުހުން ވިދާޅުވީ ހާދިސާ ހިނގި އިމާރާތުން 14 މީހަކު ސަލާމަތްކުރެވިފައިވާނެ ކަމަށެވެ.
