ފުލުހުން މިއަހަރު ޓޭޒާ ގަން ބޭނުންކުރަން ފަށަނީ
މި އަހަރު ނިމުމުގެ ކުރިން ފުލުހުންގެ އޮޕަރޭޝަންތަކުގައި ޓޭޒާ ގަން ބޭނުންކުރަން ފަށާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ހަމީދު ވިދާޅު ީ ފުލުހުންގެ ޚިދުމަތުގެ ޤާނޫނުގެ ދަށުން ފުލުހުންގެ ސަލާމަތާއި ރައްކާތެރިކަމަށާއި، މުޖުތަމަޢުގެ ސަލާމަތަށްޓަކައި ބޭނުން ކުރަން ފެށުމަށް ތައްޔާރުވާ ޓޭޒާ ގަން މިއަހަރުގެ ތެރޭގައި ފެށުމަށް އުސޫލު ހަދައި ގެޒެޓްވެސް ކޮށްފައިވާކަމަށެވެ.
ޓޭޒާގަން ޖެހުމާއެކު ގާތްގަނޑަށް 5 ވަރަކަށް ސިކުންތު މީހާގެ ހަރަކާތް ހުއްޓޭނެއެވެ. މިކަމުގެ ސަބަބުން ފުލުހުންނަށް މީހުން ހައްޔަރުކުރުމަށް ފަސޭހަވެގެންދާނެ ކަމަށް ހަމީދު ވިދާޅުވިއެވެ.
މި ޓޭޒާ ގަން ބޭން ކުރާ ކޮންމެ ޕޮލިސް އޮފިސަރެއްގެވެސް ޔުނިފޯމްގައި ބޮޑީވޯން ކެމެރާ ހުންނާނީ ހަރުކޮށްފައެވެ. އެއްވެސް ހާލަތެއްގައި ޓޭޒާގަން ބޭނުންކުރާނަމަ، ބޮޑީވޯން ކެމެރާއަށް އެސަރަހައްދުގައި ހިނގާ ހުރިހާކަމެއް ރެކޯޑު ކުރެވިގެންދާނެއެވެ.
ފުލުހުން ބޭނުން ކުރަން ތައްޔާރުވާ ޓޭޒާ ގަންއަކީ އެމެރިކާގައި ތައްޔާރުކޮށް، މިހާރު ދުނިޔޭގެ ކުރިއަރާފައިވާ ގިނަ ގައުމުތަކުގައި ބޭނުން ކުރަމުންދާ ވަސީލަތެކެވެ.
