އެންމެ ރަނގަޅު ވެރިކަމެއް ކުރެވޭނީ، މީހުން މެނޭޖް ކުރެވޭ މީހުންނަށް: އިމްރާން
އެންމެ ރަނގަޅު ވެރިކަމެއް ކުރެވޭނީ އެންމެ މޮޅަށް މީހުން "މެނޭޖް" ކުރެވޭ ކަހަލަ ބޭފުޅުންނަށް ކަމަށް ހޯމް މިނިސްޓަރު، އަދި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީީސް އިމްރާން ޢަބްދުﷲ ވިދާޅުވެއްޖެއެވެ.
ވެރިކަން ކުރާ މައި ޕާޓީ، އެމްޑީޕީގެ ޕްރައިމަރީގެ ކެމްޕެއިން، ވަރަށް ފޯރީގައި ކުރިއަށްދާ މި ދަނޑިވަޅުގައި އިމްރާން ކުރެއްވި ޓްވީޓެއްގައި ވިދާޅުވީ މީހުން ގެންގުޅެން އެނގުމަކީ ކަންކަން ކުރަން ރަނގަޅަށް އެނގުން ކަމަށެވެ.
"އެންމެ ރަނގަޅަށް ވެރިކަމެއް ކުރެވޭނީ އެންމެ މޮޅަށް މީހުން މެނޭޖްކުރެވޭ މީހަކަށްކަމީ ޒަމާނުއްސުރެ އިންސާނުން ގަބޫލު ކުރަމުން އަންނަ ހަޤީޤަތެއް." އިމްރާން ވިދާޅުވިއެވެ.
އިމްރާން މިފަދައިން ވިދާޅުވިއިރު، ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި، ކޯލިޝަން ނުރޫޅި ދައުރު ފުރިހަމަ ކުރަމުންދާކަން ގިނަ ބަޔަކު ފާހަގަކުރެއެވެ. މީގެ ކުރިން، އެއްވެސް ވެރިޔަކަށް، މިހައި ގިނަ ދުވަހު ކޯލިޝަނާއެކު ވެރިކަން ކުރެއްވިފައެއް ނުވެއެވެ.
ރައީީސް ޞާލިހުގެ ވިސްނުންފުޅު ހުރީ، މި އަހަރުގެ ރިޔާސީ އިންތިޚާބަށްވެސް، ކޯލިޝަނަކާއެކުގައި ނުކުންނެވުމަށެވެ. ރަސްމީ ސިފައެއްގައި، ކޯލިޝަންގެ ބައިވެރިންނާ މި ވާހަކަ ނުދެއްކެވިޔަސް، ކޯލިޝަނުގެ ލީޑަރުންގެ ތާޢީދު، އެމަނިކުފާނަށް އޮތްކަން ޔަޤީން ކަމަށްވެސް ރައީސް ވަނީ ވިދާޅުވެފައެވެ.
އެމްޑީޕީގެ ޕްރައިމަރީ އޮންނާނީ މި މަހުގެ 28 ގައެވެ. މި އިންތިޚާބުގައި ރައީސާ ވާދަކުރައްވަނީ ކުރީގެ ރައީސް މުޙައްމަދު ނަޝީދެވެ.
