އާރްޓީއެލްގެ ފުރިހަމަކަމުގެ ވާހަކަ ޕީޕީއެމްއިންވެސް ދައްކާ: ރިޒާ
މިސަރުކާރުގެ ތަރައްގީގެ ވާހަކަ އިދިކޮޅުން ދައްކާކަމަށާ ހައި ސްޕީޓް ފެރީ ނިޒާމް ކަމުގައިވާ އާރްޓީއެލްގެ ފުރިހަމަކަމުގެ ވާހަކަ އިދިކޮޅު ޕީޕީއެމްގެ މެމްބަރުންވެސް ދައްކާކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވެއްޖެއެވެ.
އެމްޑީޕީން ރޭ ނ،ވެލިދޫގައި "އެމްޑީޕީ ކުރިއަށް" ނަމުގައި ބޭއްވި ހާއްސަ ޖަލްސާގައި ވާހަކަ ދައްކަވަމުން ރިޒާ ވިދާޅުވީ ރައްޔިތުމީހާގެ އޮންނަނީ ދެ އުއްމީދު ކަމަށާއި އެއީ ތިމާ އަށް ރަނގަޅު ގޮތެއްވުމާއި ތިމާގެ މާހައުލަށް ރަނގަޅު ގޮތެއްވުން ކަމަށެވެ. އަދި ރައީސް އިބްރާހިމް މުހައްމަދު ޞާލިހުގެ ސަރުކާރުން ޔަގީނުންވެސް މި ދެބޭނުން ފުއްދަދީފައިވާކަމަށާއި މިވީ ހަތަރުއަހަރުގެ ތެރޭ އެއްހާސް ތިން ސަތޭކަ ފަންސާހަށްވުރެ ގިނަ ޕްރޮޖެކްޓްގައި ސޮއިކޮށްފައިވާކަމަށް ރިޒާ ވިދާޅުވިއެވެ.
"ޕީޕީއެމް ކުއްޖާވެސް އަޅުގަނޑު ކައިރި ބުނީ ތިމަންނަމެން ގަބޫލުކޮށްފީމޭ އާރްޓީއެލްފެރީ ހަމަ ހާދަ ހިތްގައިމޭ. ހާދަ ހިތްހައިމޭ ޕްލޭނިން މިނިސްޓަރ ވިދާޅުވިގޮތަށް ހަމަ ލެނގިލައިގެން އަރާމުގައި ފޯނު ޗާޖައް ޖަހައިގެން ތިމަންނަގެ ހަމަ ބިޓުންނާއި އަނބިންނާއި ވާހަކަދައްކަން ތިއްބާ ގޮސް ލަފަނީއޭ. ދާން އޮތް މަންޒިލަށޭ. ވާނުވާވެސް ނޭނގެއޭ" ރިޒާ ވިދާޅުވިއެވެ.
އިތުރަށް ވާހަކައްކަވަމުން ރިޒާ ވިދާޅުވީ އެމްޑީޕީގެ އެންމެ ބޮޑު ސިޔާސަތަކީ ތާހިރު ދިރިއުޅުމެއް ދިވެހި ރައްޔިތުންނަށް ހޯދައިދިނުންކަމަށެވެ. އަދި ކުޑަރަށް ތަރައްގީ ކުރުމަކީ އެމްޑީޕީގެ ސިޔާސަތެއް ނޫންކަމަށް ނަޝީދު ވިދާޅުވި ވިދާޅުމަށް ރިޒާ ވަނީ ރައްދުދެއްވާފައެވެ.
"މީގެ ދެހަފްތާ ކުރިން އަޅުގަނޑަށް ނޫސްތަކުން ފެނުނީ ކުޑަރަށެއް ބޮޑުރަށެއް ފަޅުރަށެއް ނުބަލާ ތަރައްގީކުރުމަކީ ސިޔާސަތެއް ނޫނޭ އެބަސްބުނެފައި އޮތް ބޭފުޅާ އެހެން ވިދާޅުވީމާ އަޅުގަނޑު ހިތަށް އެރި މިކަމާއި މެދު ވިސްނާލަން ޖެހޭ ކަމެކޭ. ކުޑަރަށެއް ބޮޑުރަށެއް ފަޅުރަށެއް ނުބަލާ ތަރައްގީ ކުރުމަކީ އެމްޑީޕީގެ ސިޔާސަތެއް ނޫނޭ. އެކަމަކު ތާހިރު ދިރިއުޅުމެއް ދިވެހި ރައްޔިތުންނަށް ހޯދައިދިނުމަކީ އެމްޑީޕީގެ އެންމެ ބޮޑު ސިޔާސަތު" ރިޒާ ވިދާޅުވިއެވެ.
ރިޒާ ވިދާޅުވީ އެމްޑީޕީން އަބަދު ކިޔަމުން ދިޔައީ ދިވެހި ރާއްޖޭގެ ރައްޔިތުންނަށް އެމްޑީޕީން ގެނެސްދޭނީ ތާހިރު ދިރިއުޅުމެއްކަމަށާއި ކުޑަ ރަށް ވެސް އަދި ބޮޑު ރަށްވެސް އޮންނަނީ ދިވެހިރާއްޖޭ ބައްރު ތެރޭގައިކަމަށެވެ.
