ސަރުކާރުން ކުޅެނީ އަކުން ބަކުން، އެއްވެސް ރަށެއްގަ ކަމެއް ވެފައެއް ނެތް: ރައީސް ނަޝީދު
ސަރުކާރުން ކުޅެނީ “އަކުން ބަކުން” ކަމަށާއި އެއްވެސް ރަށެއްގަ ކަމެއް ވެފައި ނެތް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީ ރިޔާސީ ޕްރައިމަރީގެ ކެމްޕެއިންގައި މާލޭގެ ރާޅުގަނޑު ސަރަހައްދުގައި މިރޭ ކުރިޔަށްދިޔަ ޖަލްސާގައި ވާހަކަފުޅުދައްކަވަމުން ނަޝީދު ވިދާޅުވީ ވަންނާނެ ތަނެއް ހޯދައިދިނުމަކީ އެންމެ ބޮޑު ވާޖިބު ކަމަށެވެ. އަދި ރައީސް ޞާލިޙްގެ ވެރިކަމުގައި މާލޭ ރައްޔިތުންނަށް ބޯހިޔާވަހިކަން ފޯރުކޮށްދޭނެ ސިޔާސަތެއް ނެތް ކަމަށް ވިދާޅުވިއެވެ.
“2022 ވަނަ އަހަރަށް ދިޔައިރުވެސް އެންމެ ފްލެޓެއްވެސް އަޅަނަވެސް ނުފަށާ. އޭގެ އިތުރުން ގޯއްޗެއް ދިނުމަށް ދިޔައީ އިންކާރު ކުރަމުން. މެމްބަރުން އިންތިހާއަށް އިހުތިޖާޖު ކުރުމުން ދެން އެންމެ ފަހުން ގޯތި ކަނޑާނެ ކަމަށް ރައީސް އެއްބަސްވީ” ރައީސް ނަޝީދު ވިދާޅުވިއެވެ.
މީގެ އިތުރުން އެމަނިކުފާނު ދާ ކޮންމެވެސް މަޝްރޫއޫއެއް ފަށާފައި ހުންނަތަން ފެނުނު ނަމަވެސް މަސައްކަތް ކުރިޔަށް ނުދާ ކަމަށް ރައީސް ނަޝީދު ވިދާޅުވިއެވެ. ރައީސް ޞާލިހަށް ވަރަށް ބޮޑަށް ފާޑުވިދާޅުވަމުން ރައީސް ނަޝީދު ވިދާޅުވީ ސަރުކާރުން ކުޅެނީ “އަކުން ބަކުން” ކަމަށެވެ.
“ބޮޑު ސްކޭލެއްގަ އަކުން ބަކުން ކުޅުން. ކޮންމެ ރަށެއްގަ އެބަހުރި ވެލި ފުނިތަކެއް ޖަހާފަ. އަޅުގަނޑު ހިތަށް މި އަރަނީ އަތް އަޅަންށޭ ޖެހޭނީ ތަރައްގީ ހޯދަން. ދެން ވަށައިގެން ފޮހުނީމާ އަތް ދަށުގައި ތަރައްގީ އޮތިއްޔާ ފެންނާނެއޭ. އެއްވެސް ރަށެއްގަ ކަމެއް ވެފައެއް ނެތް” ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީ މެމްބަރުން ކަންބޮޑު ވަނީ ކަންކަން ނުނިމޭތީ ކަމަށެވެ. އަދި މި ސަރުކާރުގެ ޝިއާރަކީ "އަންނަނީ އަންނަނީ" ކަމަށާއި ބޮޑު ޕްރޮޖެކްޓެއް ނުވަތަ ކުޑަ ޕްރޮޖެކްޓަކަށް ބެލި ނަމަވެސް ފެންނަނީ ހަމަ އެ ބޯޑު އަޅުވާތަން ކަމަށް ރައީސް ނަޝީދު ވިދާޅުވިއެވެ.
