އައްޑޫގެ ރައްޔިތުން ނެތި، އެމްޑީޕީއެއް ނޯންނާނެ: ރައީސް
އައްޑޫ ސިޓީ އަކީ ތަރައްޤީގެ ވިސްނުމުގެ މައި ހަބެއް ކަމަށާއި، އެ ސިޓީގެ ރައްޔިތުން ނެތި، އެމްޑީޕީއެއް ނޯންނާނެ ކަމަށް ރައީސް އިބްރާހީމް މުޙައްމަދު ޞާލިޙު ސިފަ ކުރައްވައިފިއެވެ.
އައްޑޫ ސިޓީ ފޭދޫގައި މިއަދު ބޭއްވެވި އެމްޑީޕީގެ ރިޔާސީ ޕްރައިމަރީގެ ކެމްޕެއިން ޖަލްސާގައި، އެ ޕާޓީގެ އިސް ލީޑަރު ވިދާޅުވީ ރާއްޖެއަށް އަންނަ ކޮންމެ ބަދަލެއްގެ ހެޔޮ ފާހަގަ އެންމެ ފުރަތަމަ ފެންނަން ޖެހޭނީ އައްޑޫ ސިޓީން ކަމަށާއި، އެ ސިޓީގެ ރައްޔިތުންނަކީ ސިޔާސީ، އަދި ތަރައްޤީގެ ފިކުރުގެ މައި ހަބެއް ކަމަށެވެ.
އަދި އައްޑޫ ސިޓީގެ ރައްޔިތުން ނެތި އެމްޑީޕީއެއް ނޯންނާނެ ކަމަށާއި، އެ ސިޓީގެ ރައްޔިތުންނަކީީ އިސްލާހީ މަސައްކަތުގައި، އެންމެ އިސް ސަފުގައި މަސައްކަތް ކުރާ ބައެއް ކަމަށްވެސް ވިދާޅުވިއެވެ.
"ކުރިއަށް މި އޮތް ޕްރައިމަރީގައި އެއް ދާއިރާއަކުން، އެއް ރަށަކުން، އެންމެ ގިނަ ބަޔަކު ވޯޓު ލަނީ އައްޑޫ ސިޓީން. މިކަމުން އެކަނިވެސް، އައްޑޫ ސިޓީއާ އެމްޑީޕީއާ، މި އިސްލާހީ މަސައްކަތާ އޮތް ގުޅުން ވަަރަށް ބޮޑަށް ސާފުވެގެންދޭ."
މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގައި، ރައީސް ޞާލިޙާ ވާދަކުރައްވަނީ އެމްޑީޕީގެ ރައީސް މުޙައްމަދު ނަޝީދެވެ. މި ކެމްޕެއިނުގެ ފޯރި ވަަރަށް ގަދަވެފައިވާއިރު، ދެ ކެންޑިޑޭޓުންވެސް ގެންދަނީ އެކަކު އަނެކަކަށް ހޫނު ބަހުގެ ހަމަލާތަކެއް ދެއްވަމުންނެެވެ.
