ދިވެހީން އަޅުކަން ކުރި ކަމަށް ބެލެވޭ ބުދެއް ފެނިއްޖެ
ލ.ގަމުގައި މަސައްކަތެއް ކުރުމަށް ވެލި ފުނިތަކެއް ސާފުކުރަނިކޮށް އެތައް ޒަމާނެއްވެފައިވާ ބުދެއްގެ ބައެއް ފެނިފައިވާ ކަމަށް މޯލްޑިވްސް ހެރިޓޭޖް ސޮސައިޓީން ވިދާޅުވެއްޖެއެވެ.
ފެންނަ ފެނުމަށް، އެތައް އަހަރެއް ވެފައިވާ މި ބުދު ހަދައިފައިވަނީ ހިރިގަލާއި އުވައިންނެވެ. ލ.ގަމު ކައުންސިލުން ވިދާޅުވި ގޮތުގައި، މި ބުދު ފެނިފައިވަނީ ގަމު މުކުރިމަގުން އަލަށް ގޯތި ދިން ސަރަޙައްދުންނެވެ.
އެގޮތުން ގޯތި ދިން ސަރަޙައްދުގެ މަގުތައް ހަދަން އެތަނުގައި ހުރި ދެ ފަސްފުނިން، އެއް ފަސްފުނި ކޮނެފައިވަނީ މީގެ ދެ މަސް ކުރިންކަމަށެވެ. އަދި މި ބުދު ފެނިފައިވަނި ކޮނުނު ފަސްތައް އެހެން ހިސާބަކަށް ގެންދިއުމަށް ފަސްގަނޑު ނެގުމުގެ މަސައްކަތް ކުރަމުންދަނިކޮށެވެ.
މި ބުދު ވަނީ މޯލްޑިވްސް ހެރިޓޭޖް ސޮސައިޓީގެ ބެލުމުގެ ދަށަށް ގެންގޮސްފައެވެ. ހަތ7 އިންޗިހުރި މި ބުދަކީ މީގެ 900 އަހަރެއްހާ ކުރީގެ ބުދެއްކަމަށް ބެލެވޭކަމަށް މޯލްޑިވްސް ހެރިޓޭޖް ސޮސައިޓީން ވިދާޅުވެއެވެ.
