ދިވެހީން ތިބީ ތުރުކީގެ ރައްޔިތުންނާއެކުގައި: ރައީސް
ތުރުކީއަށް އައި ބާރުގަދަ ބިންހެލުމުގައި އެތައް ބަޔަކު މަރުވުމަކީ ލިބިވަޑައިގެންނެވި ފުން ހިތާމައެއް ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެތައްހާސް މުސްލިމުންނެއް ދިރިއުޅޭ ތުރުކީއަށް އައި ބިންހެލުމުގައި ގާތްގަނޑަކަށް ތިން ހާހާ ގާތް ކުރާ އަދަދަކަށް މީހުން މަރުވެފައިވާއިރު، މަރުވި މީހުންގެ އަދަދު 10،000އަށް އަރާނެ ކަމަށް ބޭރުގެ އެކި ފަރާތްތަކުން ލަފާ ކުރާ ކަމަށް ރިޕޯޓްތަކުގައިވެެއެވެ.
މި ހިތާމަވެރި ހާދިސާއާ ގުޅިގެން ރައީސްގެ ތައުޒިޔާ މެސެޖުގައި ވަނީ ބިން ހެލުމާ ގުޅިގެން މަރުވި މީހުންގެ އާއިލާތަކަށް ތައުޒިޔާ ފޮނުއްވާ ކަމަށެވެ.
ތުރުކީއަށް ކުރިމަތިވެފައިވާ ހިތާމަވެރި މިހާދިސާގައި ދިވެހިރާއްޖެ އޮތީ ތުރުކީގެ ރައްޔިތުންނާ އެކުގައި ކަމަށްވެސް ރައީސް ވިދާޅުވިއެވެ.
ތުރުކީ އަށް ބާރުގަދަ ބިން ހެލުމުގެ ސަަބަބުން 2،921 މީހުން މިހާތަނަށް ވަނީ މަރުވެފައެވެ. އަދި 15،834 މީހުންނަށް އެކިވަރުގެ އަނިޔާ ވަނީ ލިބިފައެވެ. ބިންހެލުމާ ގުޅިގެން އެ ޤައުމުގައި ހިތާމައިގެ ހަތް ދުވަސް އިޢުލާނު ކޮށްފައިވެއެވެ.
Ads by STO
