ބްރިޖް މަތީ ހިނގި އެކްސިޑެންޓެއްގައި ސައިކަލާއި ކާރެއް "ޗިސްޗިސް" ވެއްޖެ
މާލެއާއި ހުޅުމާލެ ބްރިޖްގައި ހިނގި ނުރައްކާތެރި އެކްސިޑެންޓެއްގައި މީހަކަށް ބޮޑު ޒަޚަމްތަކެއް ލިބިއްޖެއެވެ.
މައުލޫމާތު ލިބިފައިވާ ގޮތުގައި އެކްސިޑެންޓް ހިނގާފައިވަނީ ސައިކަލަކާއި ކާރެއް ޖެހިގެންނެވެ. އެކްސިޑެންޓް ހިނގި ވަގުތު އެ ސަރަހައްދުގައި ހުރި މީހަކު "ދެން"އަށް ބުނީ އެކްސިޑެންޓް ހިނގީ ސައިކަލު އެއްލޭނުން އަނެއްލޭނަށް ބަދަލުވާން އުޅުމުގެ ތެރޭގައި ގޮސް ކާރުގައި ޖެހިގެން ކަމަށެވެ.
ދައުރުވަމުން އަންނަ ފޮޓޯތަކުން ފެންނަަ ގޮތުގައި ކާރުގެ ކުރީ ބަޔަށް ވަރަށް ބޮޑަށް ގެއްލުން ވެފައިވާއިރު، ސައިކަލު ވަނީ ބޭނުން ނުކުރެވޭ ވަރަށް ހަލާކުވެފައެވެ.
ސައިކަލު ދުއްވަން އިން މީހާގެ ހަށިގަނޑުން އެކި ދިމާ ދިމާ ބިންދައިގެން ގޮސްފައިވާއިރު، އެ މީހާއަށް މިހާރު ދަނީ ފަރުވާ ދެމުންނެވެ. އެ މީހާގެ ހާލު ވަރަށް ސީރިޔަސް ކަމަށް މައުލޫމާތ ލިބެއެވެ.
ފުލުހުން ވިދާޅުވީ، ހައިވޭގައި ކާރަކާއި ސައިކަލެއް އެކްސިޑެންޓު ހިނގައިގެން އުޅޭ ސަރަޙައްދުގައި ފުލުހުން ހަރަކާތްތެރިވަމުންދާކަމަށެވެ. ނަމަވެސް އިތުރު ތަފްޞީލެއް ފުލުހުން ދެއްވާފައެއްނުވެއެވެ.
