ބައިބައި ނުވެ އޮތީ، ހަމައެކަނި ޕީޕީއެމް-ޕީއެންސީ: ސައީދު
ރާއްޖޭގެ ސިޔާސީ ޕާޓީތަކުގެ ތެރެއިން ކޯޅުމެއް ނެތި، އެކަތިގަނޑެއްގެ ގޮތުގައި އޮތީ ހަަމައެކަނި ޕީޕީއެމް-ޕީއެންސީ ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވެފައިވަނީ، ޕީޕީއެމްގެ އޮފީހުގައި ރޭ ބޭއްވި ޖަގަހަ ޖަލްސާގައި ވާހަކަ ދައްކަވަމުންނެވެ.
އޭނާގެ ވާހަކައިގައި ޕީޕީއެމް-ޕީއެންސީގެ އެންމެ ބޮޑު ހިތްވަރަކީ އެ ކޯލިޝަންގެ ލީޑަރު، ރައީސް ޔާމީން އަބްދުލްޤައްޔޫމް މިނިވަން ކުރަން ބޭނުންވެ، އެކަމަށް މަސައްކަތް ކުރާ ޒުވާނުންނާ ކަނބަލުން ކަމަށެވެ. އަދި ރާއްޖޭގެ ސިޔާސީ ޕާޓީތައް ބައިބައި ވެފައިވާއިރު، ޕީޕީއެމް-ޕީއެންސީގެ ކިބައިން ފެންނަނީ އެއްބައިވަންތަކަން ކަމަށްވެސް ސައީދު ވިދާޅުވިއެެވެ.
"ރައީސް ޔާމީންގެ ފަހަތްޕުޅުގަ، ތި ބޭފުުޅުން ތިޔަ ތިއްބެވީ ސާބިތުކަމާއެކުގަ. އަޅުގަނޑުމެންގެ ލީޑަރޝިޕް، ސެނެޓް، ލީޑަރުން، އަދި ރަށްރަށުގެ ދާއިރާތަކުގެ ރައީސުންނާ ސްޓިއަރިން ކޮމިޓީތަކާ، މި އޮތީ ގުޅި ލާމެހިފައި."
ސައީދު އިތުރަށް ވިދާޅުވީ ރައީސް ޔާމީން މިނިވަންކޮށް، އެ މަނިކުފާނަށް އަނެއްކާވެސް ރާއްޖޭގެ ވެރިކަން ހޯދައިދިނުމަށް ފަހުގައި ނޫނީ އިދިކޮޅުން ގެއަށް ވެސް ނުވަންނާނެ ކަމަށެވެ.
ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން، 11 އަހަރަށް ޖަލަށް ލުމަށް ކްރިމިނަލް ކޯޓުން ޙުކުމް ކުރީ، މިދިޔަ ޑިސެމްބަރުމަހުގެ 25 ވަނަ ދުވަހުއެވެ. އެ މަނިކުފާނުގެ މައްޗަށް ކުރި ޙުކުމް ހައި ކޯޓުގައި ވަރަށް އަވަހަށް އިސްތިއުނާފު ކުރާނެ ކަމަށް ވަކީލުން ހާމަކުރައްވައިފައިވެއެވެ.
ފުރާޅުގަ ދެކުލައިން ޓިނުޖަހައިގެން އުޅެނީ ބައިބައިނުވާތީތަ؟