މި ސަރަހައްދުގެ ފުރަތަމަ "އެއަރ ބަބްލް" ރާއްޖެއާ އިންޑިއާ ދެމެދު ގާއިމްކުރަނީ
ބޭސްފަރުވާއަށް އިންޑިއާއަށް ދާން ބޭނުންވާ ދިވެހިންނަށާއި އިންޑިއާއިން ރާއްޖެއަށް އަންނަން ބޭނުންވާ އެ ގައުމުގެ ރައްޔިތުންނަށް ދެ ގައުމުގެ ދެމެދު ދަތުރު ކުރެވޭނެ ފަސޭހަ އިންތިޒާމެއް ހަމަޖެއްސުމަށް ނިންމައިފިއެވެ.
ފޮރިން މިނިސްޓްރީން ބުނީ އިންޑިއާއާއި ރާއްޖެއާ ދެމެދު ގާއިމްކުރާ "އެއާ ބަބަލް" ނުވަތަ "އެއާ ބްރިޖް"ގެ ސަބަބުން ކޮވިޑް-19ގެ ޙާލަތާއި ގުޅިގެން ދެގައުމުގެ ދޭތެރޭގެ މަޑުޖެހިފައިވާ ވައިގެ ގުޅުން އަލުން ފެށިގެންދާނެކަމަށެވެ.
މި އިންތިޒާމް ނުވަތަ އެއާ ބަބްލްގެ ދަށުން އިންޑިއާގެ ރައްޔިތުންނަށް ދިވެހިރާއްޖެއަށް ދަތުރުކުރެވޭނެ ފަސޭހަ ގޮތްތަކެއް ހަމަޖެހިގެންދާނެ ކަމަށާއި އިންތިޒާމުގެ ދަށުން ކުރާ ފުރަތަމަ ދަތުރު މިމަހުގެ 18 ވަނަ ދުވަހު ދިއްލީ އާއި ޓްރިވެންޑްރަމް އިން މާލެ އައުމަށް ހަމަޖެހިފައިވާކަމަށް އިންޑިއާ ހައިކޮމިޝަނުން ބުނެއެވެ.
އިންޑިއާ ހައިކޮމިޝަނުން ބުނީ ދިވެހިރާއްޖެއަކީ އިންޑިއާއިން މިފަދަ 'އެއާ ޓްރެވެލް ބަބްލް' އެއް ޤާއިމްކުރާ މަދު ގައުމުތަކުގެ ތެރޭގައި ހިމެނޭ ޤައުމެއް ކަމަށެވެ. އަދި މިއީ ކޮވިޑް-19 އަށްފަހު، ދެކުނު އޭޝިއާ ސަރަހައްދުގައި ގާއިމްކުރެވޭ މިފަދަ ފުރަތަމަ އެއަރ ބަބްލް ކަމަށް ފޮރިން މިނިސްޓްރީން ބުނެއެވެ.
ފޮރިން މިނިސްޓްރީން ބުނީ މި އެއަރ ބަބްލްއާއެކު ޝެޑިއުލް ފްލައިޓްތައް ދެ ގައުމުގެ މެދުގައި ފެށިގެންދާނެ ކަމަށާއި ދަތުރުތައް ފެށި ނަމަވެސް، ކޮވިޑް-19 އިން ރައްކާތެރިވުމަށް މިހާރު އަޅާފައިވާ ރައްކާތެރިކަމުގެ ފިޔަވަޅުތައް ދެ ގައުމުން ވެސް ދަމަހައްޓަމުން ގެންދާނެކަމަށެވެ.
